Aşgabat şäheriniň Söwda-senagat edarasynyň Sergi merkezinde çaga harytlary önümçiligini, bilimi, döredijilik we sport ugurlaryny, şeýle hem maşgala dynç alyşyny jemleýän «Kids Expo: Ähli zat çagalar üçin — 2026» atly halkara sergi-ýarmarkasy dabaraly döküldy. Şeýle giň gerimli çäräniň meýdany 8 müň inedördül metre golaý bolup, sergi günlerinde bu ýere 10 müňden gowrak adamyň gelmegine garaşylýar.

Türkmenistanyň Prezidenti Serdar Berdimuhamedow sergä gatnaşyjylara we myhmanlara baýramçylyk Gutlagyny ýollady. Döwlet Baştutanymyz öz Gutlagynda: «Bu iri möçberli sergi-ýarmarka ýurdumyzyň we daşary ýurtlaryň çagalar üçin harytlardyr hyzmatlar pudagynda iş alyp barýan kompaniýalaryna, bilim edaralaryna, halkara guramalara öz döwrebap önümlerini we hyzmatlaryny, häzirki zaman gazananlaryny hem-de geljekki ösüş ugurlaryny görkezmäge mümkinçilik döreder» diýip aýratyn belledi.

Serginiň esasy mazmuny täze doglan çagalar üçin harytlardan, öwrediji innowasion tehnologiýalardan, ekologik taýdan arassa önümlerden, çaga modasyndan, edebiýatdan we sport ugurlaryndan ybaratdyr. Şeýle-de myhmanlar üçin Küşt mekdepleriniň bütindünýä federasiýasynyň amaly sapaklary, hünärler şäherçesi, STEM-ylmy zolagy, planetariý, çaga zehinleri we Art-zolagy ýaly köpsanly interaktiw meýdançalar işleýär.

Halkara sergi-ýarmarka 2026-njy ýylyň 19 — 22-nji awgusty aralygynda Çandybil şaýolunyň 143-nji salgysynda (Söwda-senagat edarasynyň binasynda) geçirilýär. Iş tertibi: 19–21-nji awgustda sagat 09:00-dan 18:00-a çenli, 22-nji awgustda bolsa sagat 09:00-dan 13:00-a çenli.

Sergi merkezine girmek üçin şäher içindäki № 35, 54, 56, 57, 58, 103 we 121-nji ugurly awtobus gatnawlaryndan peýdalanmak bolýar.