Paýtagtymyzda gurluşyk, innowasion tehnologiýalar we döwrebap şäher gurşawyny kemala getirmek ulgamlaryna bagyşlanan XXV halkara serginiň we maslahatyň başlanmagyna sanlyja günler galdy. Şu ýylyň 24-25-nji maýynda geçiriljek bu abraýly foruma gatnaşmak isleýän daşary ýurtly we ýerli hünärmenleri resmi taýdan hasaba almak işleri tamamlanyp barýar. Taslamanyň şu gezekki gün tertibi ilat ýaşaýan ýerlerini durnukly we hemme taraplaýyn elýeterli ösdürmek ýörelgelerine esaslanýar.

Iri göwrümli çärä global gurluşyk we energetika bazarynyň esasy wekilleriniň, şeýle hem medeni-durmuş düzümleri ulgamynda öňdebaryjy daşary ýurt kompaniýalarynyň gatnaşmagyna garaşylýar. Dünýäniň onlarça döwletinden geljek ýüzlerçe resmi wekil utgaşykly gurşawda döwrebap innowasiýalary durmuşa geçirmegiň amaly taraplaryny we tejribelerini özara paýlaşarlar.

Forumyň meýlleşdirilen işewürlik maksatnamasynyň çäklerinde halkara guramalaryň, şol sanda Birleşen Milletler Guramasynyň ýokary derejeli wekilleriniň gatnaşmagynda ýörite duşuşyklar guralar. Plenar mejlislerde we «tegelek stoluň» başynda paýtagtlary sanlylaşdyrmak, şäher dolandyryşyna «akylly» tehnologiýalary ornaşdyrmak hem-de halkara maýa goýum şertnamalaryny baglaşmak meseleleri jikme-jik seljeriler.

Häzirki wagtda guramaçylyk komiteti tarapyndan halkara hyzmatdaşlygy ösdürmäge we täзе işewürlik gatnaşyklaryny ýola goýmaga gönükdirilen çäreleriň senenamasy gutarnykly tassyklanyldy. Hemaýatkärlik taslamalary we dabaranyň geçiriljek ýerleri baradaky ähli zerur maglumatlar halkara forumyň ýöriteleşdirilen internet sahypasynda raýatlara we tor ulanyjylaryna yzygiderli ýetirilip durlupdyr.