2026-njy ýylyň ýanwar – iýul aýlarynda Türkmenistanyň nebitgaz pudagynda ýokary önümçilik netijeleri gazanyldy: nebit çykarmagyň meýilnamasy 108,7 göterim berjaý edildi. Bu barada 1-nji awgustda sanly ulgam arkaly geçirilen Hökümet mejlisinde wise-premýer G.Agajanowyň ýurtda nebitiň hem-de gazyň çykarylyşyny artdyrmak we olary dünýä bazarlaryna çykarmagyň ugurlaryny giňeltmek boýunça beren hasabatynda bellenildi.

«Türkmenistanyň Döwlet habarlar agentliginiň» (TDH) habar berşi ýaly, «Türkmennebit» döwlet konserni tarapyndan bellenilen meýilnamalaýyn wezipeler artyky bilen ýerine ýetirildi. Hasabat döwründe ýurduň nebiti gaýtadan işleýän zawodlary tarapyndan nebiti gaýtadan işlemegiň meýilnamasy 105,5 göterim berjaý edilip, pudagyň durnukly işi üpjün edildi.

Nebit önümleriniň esasy görnüşlerini öndürmekde hem ýokary ösüş depginleri gazanyldy: benzin öndürmegiň meýilnamasy 121,6 göterim, dizel ýangyjyny öndürmek 113,5 göterim, polipropilen öndürmek 100,2 göterim hem-de çalgy ýaglaryny öndürmek 103 göterim berjaý edildi. Suwuklandyrylan gazy öndürmek boýunça 122,6 göterim ösüş depgini üpjün edilip, tebigy we ugurdaş gazy çykarmagyň meýilnamasy 108,1 göterim ýerine ýetirildi.

Hormatly Prezidentimiz Serdar Berdimuhamedow hasabaty diňläp, tebigy gazyň we nebitiň çykarylyşyny mundan beýläk hem artdyrmak ile uglewodorod serişdeleriniň ýataklaryny netijeli özleşdirmek boýunça alnyp barylýan işleri dowam etmegiň wajypdygyny nygtady. Döwlet Baştutanymyz wise-premýere toplumyň kärhanalarynyň önümçilik kuwwatyny yzygiderli ýokarlandyrmagy tabşyrdy.