Türkmenistanyň Prezidenti Serdar Berdimuhamedow Waşingtonda geçirilen «Merkezi Aziýa – ABŞ» (C5+1) sammitine gatnaşdy we Ak tamda ABŞ-nyň Prezidenti Donald Tramp bilen duşuşdy.

Merkezi Aziýanyň bäş döwletiniň ýolbaşçylary we ABŞ-nyň Prezidenti Owal kabinetindäki ikitaraplaýyn gepleşikleriň yzýanyndan işlik agşam naharynda duşuşdylar.

Açylyş çykyşynda Donald Tramp Merkezi Aziýanyň artýan strategik ähmiýetine üns berdi:
«Biz ykdysady hyzmatdaşlygy güýçlendirýäris, howpsuzlyk ugrunda hyzmatdaşlygy kämilleşdirýäris we täze gatnaşyklaryň ugurlaryny açýarys» diýip, ol aýtdy.

Tramp sebitiniň taryhy ähmiýetini belläp, şeýle diýdi:
«Bu ýurtlar bir wagtlar Gündogary we Günbatary birleşdiren Beýik Ýüpek ýolunyň ýüregidi. Häzirki wagtda olaryň Eýewraziýanyň merkezindäki ýerleşişi olara aýratyn ähmiýet we uly mümkinçilik berýär».

Ol, şeýle hem, möhüm peýdaly magdanlar meselesiniň gün tertibiniň esasy ugurlarynyň biridigini aýdyp, ABŞ-nyň global üpjünçilik zynjyrlaryny we ykdysady howpsuzlygy berkidmäge ygrarlydygyny nygtady.

Donald Tramp öňki administrasiýalaryň sebitde goýberen “ýalňyşlygyny” düzedýändigine ynam bildirdi:
«Men Amerikanyň bu ýurtlaryň her biri bilen gatnaşyklaryny mundan has berkleşdirmek niýetindirin. Bu dünýäniň iň möhüm sebitleriniň biridir — köpler entek muny doly düşünmeýärler».

Serdar Berdimuhamedow çakylyk üçin minnetdarlyk bildirip, C5+1 formatynyň netijeliligini belledi:
«Bu mehanizm döredileli bäri oňyn netijeleri görýäris. Biz howpsuzlyk, ykdysadyýet, energetika we ekologiýa ýaly ugurlarda hyzmatdaşlygy giňeltmäge gyzyklanýarys».

Türkmenistanyň Prezidenti sammitiň netijeleriniň Merkezi Aziýa ýurtlary bilen Amerikanyň Birleşen Ştatlarynyň arasyndaky köpugurly hyzmatdaşlygyň ösdürilmegine itergi berjekdigine ynam bildirdi.