Hytaýyň Milli Nebit-Gaz Korporasiýasy (CNPC) Aşgabat şäherinde 2026-njy ýylyň 21–23-nji oktýabry aralygynda geçiriljek «Türkmenistanyň nebiti we gazy – OGT 2026» 31-nji Halkara maslahatyna we sergisine platina hyzmatdaş hökmünde katnaşar. Kompaniýanyň bu ýokary statusda çykyş etmegi Türkmenistan bilen Hytaýyň energetika pudagyndaky 20 ýyllyk hyzmatdaşlygyna gabat gelýär. Bu iri çäräni «Türkmengaz», «Türkmennebit» döwlet konsernleri, «Türkmengeologiýa» döwlet korporasiýasy hem-de «Turkmen Energy Forum» (TEF) bilelikde gurnaýarlar.

CNPC kompaniýasy 2007-nji ýyldan bäri Türkmenistanda işläp, strategik ähmiýetli taslamalary amala aşyrýar. 2009-njy ýylda ulanmaga berlen Türkmenistan–Hytaý gaz geçirijisiniň 3 şahasy arkaly her ýyl 30 milliard kub metrden gowrak tebigy gaz akdyrylýar. Guramaçylaryň maglumatyna görä, 2026-njy ýylyň apreline çenli Hytaýa eýýäm 430 milliard kub metrden gowrak türkmen gazy uratyldy. Mundan başga-da, Hytaýyň bu korporasiýasy ýurdumyzyň nebit-gaz pudagy üçin ýerli hünärmenleri taýýarlamaga we talyplaryň Hytaýda bilim almagyna yzygiderli ýardam berýär.

Hyzmatdaşlygyň täze möhüm tapgyry ка hökmünde 2026-njy ýylyň aprel aýynda «Galkynyş» gaz känini özleşdirmegiň IV tapgyryna badalga berildi. Taslamanyň çäklerinde täze guýular burawlanyp, ýylda 10 milliard kub metr harytlyk gaz taýýarlaýan zawodyň gurluşygy alnyp barylar. Işler doly tamamlanandan soňra 1000-den gowrak täze hemişelik iş ornunyň döredilmegi göz öňünde tutulýar.

Aşgabatda geçiriljek «OGT 2026» forumy energetika pudagynyň liderlerini, maýadarlary we halkara ekspertleri bir ýere jemlär. Maslahatda «Galkynyş» känini ösdürmek, TAPI gaz geçirijisi, Hazar deňzindäki taslamalar, gazy gaýtadan işlemek, sanlylaşdyrmak we metan zyňyndylaryny azaltmak ýaly möhüm meseleler serediler.