Aşgabadyň Halkara dikeldiş merkezinde oňurga myşsa atrofiýasy (OMA) bilen kesellän çagalaryň durmuş derejesini ýokarlandyrmaga gönükdirilen ýörite okuw maslahaty geçirildi. Bu çäre ÝUNISEF-iň hem-de Şweýsariýanyň «F. Hoffmann-La Roche Ltd» kompaniýasynyň ýardam bermeginde guralyp, maýyplygy bolan çagalar üçin döwrebap lukmançylyk hyzmatlarynyň elýeterliligini üpjün etmäge gönükdirildi. Okuwyň dowamynda dünýäniň öňdebaryjy usullaryny Türkmenistanyň saglygy goraýyş ulgamyna ornaşdyrmagyň ýollary ara alnyp maslahatlaşyldy.

Okuwa ýurdumyzyň dürli künjeklerinden gelen newrologlar, dikeldiş hünärmenleri we Arkadag şäherindäki Gurbanguly Berdimuhamedow adyndaky Çagalar sagaldyş-dikeldiş merkeziniň lukmanlary gatnaşdylar. Jemi 100-den gowrak hünärmeni birleşdiren ylmy-amaly maslahatyň çäklerinde Türkmenistanyň Saglygy goraýyş we derman senagaty ministrliginiň wekilleri hem çykyş etdiler. Hünärmenler OMA ýaly seýrek duş gelýän genetiki keselleriň bejergisinde täzeçil çemeleşmeleri ulanmagyň zerurdygyny nygtadylar.

Genetiki näsaglygyň bu görnüşi hereket ulgamyna zeper ýetirip, myşsalaryň gowşamagyna sebäp bolýar, emma çaganyň aň-düşünjesine täsir etmeýär. Şol sebäpli, okuw maksatnamasynda keseli irki döwürde anyklamak we bedeniň durşuny sazlaýyş usullaryny dogry ulanmak ýaly meselelere aýratyn üns berildi. Lukmanlar kömekçi tehniki serişdeleri peýdalanmagyň we dem alyş ulgamyny goldamagyň iň netijeli tärlerini iş ýüzünde özleşdirdiler.

Amaly okuwlaryň dowamynda OMA-ly çagalar we olaryň ene-atalary hünärmenler bilen bilelikde işlediler, bu bolsa bejergi usullarynyň maşgala şertlerinde dowam etdirilmegine şert döretdi. Çäreleriň netijesinde her bir çaga üçin özboluşly dikeldiş meýilnamalary düzüldi. Şeýle okuwlaryň yzygiderli geçirilmegi seýrek duş gelýän keselleriň idegi boýunça ýurdumyzyň lukmançylyk tejribesiniň halkara ülňülerine laýyklykda kämilleşmegine uly goşant goşýar.