Hytaýyň Halk banky dürli döwletleriň merkezi banklarynyň sanly walýutalary (CBDC) arkaly serhetüsti söwda amallaryny amala aşyrmaga şert döretjek «mBridge» platformasyny täjirçilik maksatları üçin ulanmaga bermegiň soňky tapgyryna geldi. Bu taslama Hytaýyň, Gonkongyň, Tailandyň, BAE-niň we Saud Arabystanynyň merkezi banklary tarapyndan bilelikde alnyp barylýar. Ulgamyň işini utgaşdyrmak üçin Gonkongda ýörite dolandyryş edarasyny döretmek meýilleşdirilýär.

Täze platforma blokçeýn tehnologiýasyna esaslanyp, hasaplaşyklar wagtynda ABŞ dollaryny araçy hökmünde ulanmazdan, taraplaryň öz sanly walýutalarynda göni pul geçirmelerini üpjün edýär. Berilýän maglumatlara görä, synag tapgyrynda ulgam arkaly eýýäm 470 milliard ýuan (takmynan 69 milliard dollar) möçberinde amal üstünlikli geçirildi. «mBridge» ulgamynda hyzmat göterimleriniň adaty halkara ulgamlardan iki esse arzan bolmagyna garaşylýar, bu bolsa ony kiçi we orta telekeçiler üçin has amatly edýär.

Ilkibaşda 2021-nji ýylda Halkara hasaplaşyklar bankynyň (BIS) goldamagynda başlanan taslama 2024-nji ýylda dolulygyna agza ýurtlaryň dolandyryşyna geçirildi. Hytaý tarapy bu ulgamyň jenaýatçylykly ýollar bilen alnan pullaryň kanunlaşdyrylmagyna garşy halkara kadalaryna bütinleý laýyk gelýändigini we geljekde sanly ýuanyň dünýä bazaryndaky ornuny has-da berkitjekdigini nygtaýar.