Hytaý Halk Respublikasynda itleriň we pişikleriň görüş hem-de eşidiş aýratynlyklaryny nazarda tutýan täze teleýaýlym hyzmaty işe başlady. Diňe ýörite ýazylyşygy bolan müşderiler üçin elýeterli bolan bu ýaýlym haýwanlaryň nerw ulgamyny köşeşdirmek we olaryň wagtyny peýdaly geçirmek maksady bilen döredildi. Täze hyzmat sanly platformalarda «tüýlek dostlar üçin bagt merkezi» hökmünde tanyşdyrylýar.

Teleýaýlymyň taýýarlaýan gepleşikleri adaty telegörnişlerden düýpli tapawutlanýar. Onuň reňk sazlaşygy we şekilleriň tizligi dürli it tohumlarynyň dünýäni görüş ukybyna laýyklykda işlenip taýýarlanyldy. Bu bolsa haýwanlara ekrandaky şekilleri adamyň görşi ýaly anyk kabul etmäge we olardan ruhy lezzet almaga mümkinçilik berýär.

Gepleşikleriň mazmuny iki ugur boýunça alnyp barylýar: dynç alyş we ösüş. Birinji ugurda haýwanlaryň gorkusyny we sussupesligini aýyrmaga kömek edýän tebigat manzaralary hem-de ýakymly sazlary öz içine alýan programmalar hödürlenýär. Ikinji ugur bolsa haýwanlaryň akyl ukybyny we ünsüni ösdürmäge gönükdirilen gyzykly oýunlardan hem-de hereketli pursatlardan ybaratdyr.

Häzirki wagtda Hytaýyň ykdysadyýetinde öý haýwanlaryna degişli hyzmatlar bazary iň çalt ösýän ugurlaryň biridir. Her aýda 25 ýuan tölegli bu täze hyzmat sebitde haýwanlara edilýän idegiň we çykdajylaryň ýokarlanýandygynyň subutnamasydyr. Maglumatlara görä, ýakyn ýyllarda bu pudagyň girdejisi onlarça milliard dollara ýetip, öý haýwanlaryna degişli harytlaryň we hyzmatlaryň elýeterliligini has-da artdyrar.