10-njy awgustda «Awaza» milli syýahatçylyk zolagynda Hazar deňziniň gününe bagyşlanan ekologiýa çäresi guraldy. Bu çäre BMGÖM-iň hem-de UNEP-iň Russiýa Federasiýasynyň maliýe goldawy bilen amala aşyrýan «Deňiz zibili we deňiz plastmassalary bilen göreşmek – Hazarda ulgamlaýyn çemeleşme» sebit taslamasynyň çäklerinde amala aşyryldy.

Bu asylly başlangyca Daşky gurşawy goramak, Bilim, Içeri işler, Goranmak ministrlikleri we «Ýaş tebigatçy» jemgyýetçilik guramasy tarapyndan giňden goldaw berildi. Ekologiýa dabarasy «Arzuw» hem-de «Daýanç» sagaldyş merkezlerinde dynç alýan körpeleri bir ýere jemledi.

Çäräniň çäklerinde çagalara Hazaryň haýwanat we ösümlik dünýäsi, plastigiň we mikroplastigiň tebigata ýetirýän zyýanlary barada giňişleýin maglumat berildi. Şeýle hem hünärmenler çagalara kenarda we suwda özüňi alyp baryş, ýangyn howpsuzlygy hem-de ilkinji lukmançylyk kömegi boýunça amaly sapaklary geçdiler.

Gatnaşyjylar «Hazaryň goragçylary» atly oýun-kwestde öz güýçlerini synap, ekologiýa ussahanasynda surat çekdiler we kenarýakany gözegçilikde saklaýan monitoгing enjamlarynyň işi bilen tanyşdylar. BMGÖM-iň hünärmeni Jemal Durdykowa bu çäräniň ýaş nesliň ekologiýa medeniýetini ýokarlandyrmakda uly ähmiýete eýedigini nygtady.