Magtymguly adyndaky Türkmen döwlet uniwersitetinde türkmen prozasynyň düýbüni tutujylaryň biri, görnükli ýazyjy Nurmyrat Saryhanowyň doglan gününiň 120 ýyllygy mynasybetli «Nurmyrat Saryhanow — türkmen prozasynyň ägirdi» atly döredijilik maslahaty geçirildi. Bu çäre ýazyjynyň baý edebi mirasyny öwrenmek we ony ýaş nesillere ýetirmek maksady bilen guraldy. Maslahat edebiýatçy alymlary, professor-mugallymlary we talyp ýaşlary bir ýere jemläp, hakyky edebiýat baýramyna öwrüldi.

Dabara örän täsirli — «Şükür bagşy — erkinligiň buşlukçysy» atly edebi-sazly kompozisiýa bilen badalga berildi. Bu çykyş ýazyjynyň iň meşhur eserleriniň biri bolan «Şükür bagşy» powestiniň ruhuny janlandyryp, gatnaşyjylarda uly täsir galdyrdy. Soňra maslahatda çykyş eden alymlar we mugallymlar N. Saryhanowyň türkmen edebiýatynyň ösüşine goşan saldamly goşandy, onuň eserleriniň çeperçilik aýratynlyklary barada giňişleýin durup geçdiler.

Maslahatda ýazyjynyň «Şirin», «Arzuw», «Soňky öý», «Ak tam», «Giýew» ýaly onlarça hekaýalarynyň we powestleriniň türkmen kyssaçylygyndaky orny seljerildi. Aýratyn-da, onuň «Kitap» hekaýasynyň hem-de «Şükür bagşy» powestiniň milli edebiýatymyz üçin bahasyna ýetip boljak gymmatlyklardygyny, bu eserlerde türkmen halkynyň ruhy dünýäsiniň, pelsepesiniň we ynsanperwerlik ýörelgeleriniň ussatlyk bilen beýan edilýändigi nygtaldy.

Nurmyrat Saryhanow 1906-njy ýylda Gökdepe etrabynyň Yzgant obasynda dünýä inýär. Gysga, emma manyly ömür süren ýazyjy özüniň ajaýyp eserleri bilen türkmen edebiýatynda öçmejek yz galdyrdy. Onuň doglan gününiň 120 ýyllyk ýubileýine bagşylanan bu maslahat, halkymyzyň öz nusgawy ýazyjylaryna bolan çäksiz hormatynyň we sarpasynyň nobatdaky beýanyna öwrüldi.