Mary welaýatynyň Tagtabazar etrabyna degişli Serhetabat şäheriniň töwereklerinde örän seýrek duş gelýän raý guşjagazy (jennet siňekçisi) syn edildi. Bu künjekde tebigaty öwrenijiler ony iň soňky gezek geçen asyryň 60-njy ýyllarynyň başynda (1961 we 1964-nji ýyllarda) hasaba alypdyrlar.

Ýurdumyzyň guşatgygynda jemi 410 görnüş bellenilip, olaryň 39-sy Gyzyl kitaba girizilendir. Raý guşjagazynyň Türkmenistandaky esasy mekany Köýtendag döwlet tebigy goraghanasynyň çygly, suwly jülgeleri hasaplanýar.

Bu gezek seýrek guş alymlar tarapyndan gür baglygyň arasyndaky guýynyň golaýynda bellenildi. Mutahasyslar bu görnüşiň täze mesgen tutýan ýerlerini ýüze çykarmagyň we olary gorag astyna almagyň populýasiýany saklamakda hem-de artdyrmakda uly ähmiýete eýedigini nygtaýarlar.

Bedeni boyunça serçeden biraz uly bolan bu guşjagaz uzyn guýrugy, depesindäki aýdyň saçyp duran hüpügi hem-de kellesi bilen bokurdagynyň metal öwüşginli goýy gök öwüşgini bilen tapawutlanýar.

Adatça, bu guşlar ýurdumyza maý aýynda höwürtge gurmak üçin gelýärler, gyş möwsüminde bolsa Hindistana, Pakistana hem-de Günorta we Günorta-Gündogar Aziýanyň ýylly ýurtlaryna uçup gidýärler. Bathyz çäginde ol awgust aýynyň ortalarynda gözlegçileriň gözüne ilipdir.

Bu garaşylmadyk waka milli ornitologiýa ylymy üçin uly täzelik bolup, guşlaryň käwagt öz adaty göçýän ýollaryndan we mekanlaryndan örän uzakda hem peýda bolup bilýändigini subut etdi.