Halkara söwda merkezi (HSM) tarapyndan Ýewropa Bileleşiginiň goldamagynanda guralan «Türkmenistan: söwdanyň durnuklylygy we integrasiýa» taslamasynyň çäklerinde Aşgabatda möhüm okuw maslahatlary geçirildi. Iki günüň dowamynda dowam eden bu çäreler ýurdumyzda sanly söwdany we elektron täjirçiligi düzgünleşdirýän hukuk gurşawyny döwrebaplaşdyrmaga gönükdirildi. Maslahatyň esasy wezipesi sebitiň hukuk binýadyna berlen seljermeleriň netijeleri bilen tanyşdyrmakdan we täze kanunçylyk tekliplerini taýýarlamakdan ybarat boldy.

Maslahatlara döwlet edaralarynyň we hususy pudagyň 60-a golaý wekili gatnaşyp, olar sanly ykdysadyýete geçişiň amaly taraplaryny ara alyp maslahatlaşdylar. Maslahatyň ilkinji güni telekeçileriň gatnaşmagynda geçirilip, onda Bütindünýä Söwda Guramasynyň (BSG) elektron täjirçilik baradaky Ylalaşygynyň taslamasyndaky kadalar öwrenildi. Hususy pudagyň wekilleri onlaýn-tölegleri amala aşyrmakda we daşary ýurt bazarlaryna sanly kanallar arkaly çykmakda ýüze çykýan kynçylyklary beýan edip, telekeçiligi goldaýan deňagramly kanunlaryň zerurdygyny nygtadylar.

Ikinji iş gününde döwlet düzümleriniň wekilleri üçin HSM-iň bilermenleri tarapyndan Merkezi Aziýanyň bäş ýurdunda geçirilen seljermeleriň netijeleri tanyşdyryldy. DTRRA usulyýeti boýunça geçirilen bu barlaglar Türkmenistanyň milli kanunçylygynyň halkara kadalara we BSG-niň öňdebaryjy tejribelerine laýyklygyny kesgitlemäge kömek etdi. Seljermäniň netijesinde ýurdumyzda sanly söwdany ulgamlaşdyrmak we ony hukuk taýdan berkitmek boýunça anyk maslahatlar we teklipler işlenip düzüldi.

Bu okuw maslahatlary döwlet bilen hususyýetçileriň arasyndaky gepleşikleriň täze tapgyryna öwrülip, amatly maýa goýum gurşawyny döretmäge itergi berdi. Taslamanyň çäklerinde alnyp barylýan işler kiçi we orta telekeçiligiň halkara derejesindäki bäsdeşlige ukyplylygyny artdyrmagy maksat edinýär. Geçirilen çäreleriň netijeleri Türkmenistanyň dünýäniň sanly söwda ulgamyna has işjeň goşulyşmagyna we durnukly ykdysady ösüşi üpjün etmäge ýardam berer.