Türkmenistanyň Daşary işler ministrliginde Zenanlara garşy kemsitmeleriň ähli görnüşlerini ýok etmek boýunça komitetiň (CEDAW) maslahatlaryny durmuşa geçirmäge bagyşlanan möhüm duşuşyk geçirildi. Çäräniň dowamynda gender deňligini üpjün etmek we halkara borçnamalary ýerine ýetirmek babatda amala aşyrylýan işler seljerildi. Duşuşyga döwlet edaralarynyň, şol sanda Mejlisiň we Adalatçynyň diwanynyň wekilleri bilen bir hatarda, BMG-niň degişli düzümleriniň halkara bilermenleri gatnaşdylar.

Türkmenistanyň daşary işler ministriniň orunbasary Mähri Bäşimowa öz çykyşynda ýurduň zenanlaryň hukuklaryny goramak baradaky halkara konwensiýalara ygrarlydygyny tassyklady. 2024-nji ýylyň fewralynda CEDAW Komiteti bilen geçirilen gepleşikleriň netijeleri milli kanunçylygy kämilleşdirmekde esasy gollanma hökmünde hyzmat edýär. Taraplar zenanlaryň jemgyýetçilik we döwlet durmuşyndaky ornuny berkitmek üçin täze hukuk mehanizmleriniň zerurdygyny nygtadylar.

Maslahatyň esasy mowzuklarynyň biri hem CEDAW-yň maslahatlaryny durmuşa geçirmek boýunça Ýol kartasynyň taýýarlanmagy boldy. Şeýle hem 2026 — 2030-njy ýyllar üçin gender deňligini üpjün etmek boýunça Hereketleriň milli meýilnamasynyň täze tapgyryna aýratyn üns berildi. Bu resminama geljek bäş ýylda zenanlaryň hukuklarynyň goralmagyny we olaryň mümkinçilikleriniň giňeltilmegini üpjün etmeli strategik ugurlary öz içine alýar.

Halkara guramalaryň wekilleri, şol sanda CEDAW Komitetiniň başlygynyň orunbasary Marianna Mikko, Türkmenistanyň bu ugurdaky yzygiderli ädimlerine ýokary baha berdiler. Pudagara hyzmatdaşlygy ösdürmek we halkara standartlary milli derejede ornaşdyrmak boýunça anyk maslahatlar berildi. Duşuşyk Türkmenistanyň adam hukuklaryny goramak we demokratik özgertmeleri dowam etdirmäk baradaky syýasatynyň möhüm bölegi hökmünde häsiýetlendirildi.