Şu gün paýtagtymyzyň «Ýyldyz» myhmanhanasynda Garaşsyz Döwletleriň Arkalaşygyna agza ýurtlaryň Demir ýol ulaglary boýunça geňeşiniň 84-nji mejlisi öz işine başlady. Bu iri halkara forumy 14-nji maýa çenli dowam edip, oňa gatnaşyjy döwletleriň degişli edaralarynyň ýolbaşçylary we hünärmenleri gatnaşýarlar. Mejlis sebitiň ulag-logistika kuwwatyny has-da kämilleşdirmek we demir ýol ulgamynda täze hyzmatdaşlyk platformalaryny döretmek maksady bilen guraldy.

Gepleşikleriň gün tertibinde GDA giňişliginde ýük we ýolagçy daşalyşynyň netijeliligini artdyrmak, demir ýol düzümlerini döwrebaplaşdyrmak ýaly strategik meseleler bar. Forumyň dowamynda iki we köptaraplaýyn gepleşikleriň birnäçesini geçirmek, şeýle hem täze şertnamalaryň taslamalaryny ylalaşmak meýilleşdirilýär. Şeýle hem çäräniň netijeleri boýunça metbugat wekilleri üçin ýörite brifing guralar.

Taraplar transkontinental ulag geçelgelerini ösdürmek we bu ugurda sanly tehnologiýalary ornaşdyrmak baradaky meselelere aýratyn üns bererler. Hünärmenleriň pikirine görä, bu mejlis Arkalaşygyň çäklerinde bitewi ulag ulgamynyň kemala gelmegine we döwletleriň arasyndaky söwda-ykdysady gatnaşyklaryň has-da işjeňleşmegine itergi berer. Mejlisiň netijeleri halkara demir ýol gatnawlarynyň howpsuzlygyny we tizligini üpjün etmekde möhüm ähmiýete eýe bolar.

Myhmanlar üçin taýýarlanan medeni maksatnamanyň çäklerinde olar Aşgabadyň gözel ýerlerine, hususan-da, atçylyk sport toplumyna we Türkmenistanyň Döwlet muzeýine gezelenç ederler. Şeýle hem delegasiýanyň agzalary täze açylan Magtymguly Pyragy adyndaky medeni-seýilgäh toplumynda bolup, türkmen halkynyň baý medeni mirasy bilen tanşarlar. Bu çäreler gatnaşyjy ýurtlaryň arasyndaky ynsanperwer we dostlukly gatnaşyklary has-da pugtalandyrmaga ýardam eder.