Özbegistanyň paýtagty Daşkentde VIII Merkezi Aziýa bilermenler forumy öz işine başlady. Forum sebitleýin hyzmatdaşlygy ösdürmäge gönükdirilip, oňa Merkezi Aziýa ýurtlarynyň öňdebaryjy ylmy we strategik barlag merkezleriniň wekilleri gatnaşýar. Türkmenistanyň daşary syýasat edarasynyň habar bermegine görä, foruma Türkmenistanyň Daşary işler ministrliginiň Halkara gatnaşyklary institutynyň Strategik barlaglar ylmy merkezi hem gatnaşýar.

Forumyň ilkinji mejlisinde «Täze Merkezi Aziýa: sebitleýin hyzmatdaşlygyň binýadyny kämilleşdirmek» atly mowzukda çykyş eden türkmen bilermeni Bekdurdy Amansaryýew häzirki döwürde Merkezi Aziýanyň diňe geografik sebit däl-de, eýsem syýasy gepleşikleriň, ykdysady integrasiýanyň we ynsanperwer gatnaşyklaryň giňýän giňişligine öwrülýändigini belledi.

Ol çykyşynda Türkmenistanyň sebitiň ösüşine goşandyny ýetirýän esasy ugurlary — parahatçylyk we howpsuzlyk, ulag-logistika birikmeleri, energetika, suw we ekologiýa meseleleri, şeýle-de ynsanperwer hyzmatdaşlyk barada giňişleýin durup geçdi.

Bekdurdy Amansaryýew Türkmenistanyň hemişelik bitaraplygynyň izolýasiýa däl-de, parahatçylyk döredijilik başlangyçlary üçin binýatdygyny aýtdy. Türkmenistanyň Merkezi Aziýanyň doganlyk ýurtlary bilen gatnaşyklaryň pugtalandyrylmagyna, deňhukukly hyzmatdaşlygyň ösdürilmegine hem-de adalatly we durnukly sebitleýin integrasiýa modeliniň kemala gelmegine işjeň goşant goşýandygyny nygtady.