«Apple» korporasiýasy 9-njy sentýabrda gajetleriň nobatdaky tanyşdyrylyş çäresini geçirjekdigini resmi taýdan yglan etdi. «Geň galdyr we lowurda» diýen şygar astynda guralýan bu çäre «Apple Park» kompleksindäki Stiw Jobs teatrynda bolup geçər. Maslahat ýerli wagt bilen sagat 10:00-da öz işine başlar.

Ýygnanyşygyň dowamynda kompaniýanyň «iPhone» smartfonlarynyň täze neslini köpçülige görkezmegine garaşylýar. Şeýle hem «Reuters» hem-de «Axios» neşirleriniň habar bermegine görä, brend öz taryhynda ilkinji eplenýän smartfonyny tanyşdyrmagy mümkin. Bu täze enjam açyk ýagdaýda kiçi planşeti ýatladyp, pasport möçberindäki göwrüme eýe bolar.

Bu tanyşdyrylyş kompaniýanyň täze baş direktory Jon Ternusyň baştutanlygynda geçiriljek ilkinji iri çäre bolar. Ternus köp ýyllaryň dowamynda korporasiýanyň apparat üpjünçiligini barlamak we işläp düzmek bölümine ýolbaşçylyk edip geldi. Ol 1-nji sentýabrda bu ýokary wezipede Tim Kukyň ornuny eýelär.

Şunlukda, täze ýolbaşçynyň ilkinji uly çäresi brendyň geljekki tehnologiýa strategiýasyny görkezmekde möhüm ädim bolar. Çäre tutuş dünýä boýunça onlaýn ulgam arkaly göni ýaýlymda görkeziler.