NASA-nyň berýän resmi maglumatlaryna görä, «Artemis II» missiýasynyň astronawtlary «Orion» kosmos gämisinde Ýerden iň uzak nokada çykyp, adamzat taryhyndaky täze rekordy hasaba aldylar. Kosmos gämisi Ýer şaryndan 406 608 kilometr uzaklyga çenli baryp ýetdi, bu bolsa meşhur «Apollon-13» ekspedisiýasynyň ozalky rekordyndan 6 437 kilometr artykdyr. Mundan başga-da, astronawtlar Aýyň üstünden 8 047 kilometr uzaklykda geçip, kosmosyň çuňluklaryna tarap taryhy ädim ätdiler.

Taryhy uçuşy amala aşyrýan ekipažyň düzümine astronawtlar Rid Waýsman, Wiktor Glower, Kristina Koh we Jeremi Hansen girýärler. Uçuşyň iň jogapkärli alty sagatlyk tapgyrynda olar Aýyň Ýerden görünmeýän ters tarapyny hem-de älem giňişliginden doly Gün tutulmasyny synlamaga mümkinçilik tapdylar. 2026-njy ýylyň 2-nji aprelinde Floridadaky Kennedi kosmos merkezinden badalga alan bu missiýa 1972-nji ýyldan bäri Aýyň golaýyna amala aşyrylan ilkinji adamly uçuşdyr.

Ekspedisiýanyň umumy dowamlylygy 10 güne golaý bolup, bu wagt aralygynda ekipaž Aýyň daşyndan aýlanyp geçer we gäminiň ähli tehniki ulgamlaryny synagdan geçirer. Synaglaryň üstünlikli tamamlanmagyndan soň, «Orion» gämisi Ýere tarap ugrar we ummana gonar. Bu missiýa geljekde Aýyň ýüzüne gaýtadan adam düşürmek we beýleki planetalary özleşdirmek ugrundaky halkara maksatnamalaryň möhüm tapgyry bolup hyzmat edýär.

Ýerden rekord aralyga çykmak döwrebap kosmos tehnologiýalarynyň mümkinçilikleriniň örän ýokarydygyny subut edýär we ylmyň täze sahypasyny açýar. Astronawtlaryň amala aşyrýan barlaglary we olaryň kosmosdan ýollaýan maglumatlary bütin dünýäniň alymlary üçin gymmatly çeşme bolup durýar. Bu uçuş Türkmenistanda we dünýäniň beýleki ýurtlarynda hem uly gyzyklanma döredip, adamzadyň älem giňişligini öwrenmekdäki ägirt uly öňegidişliginiň nyşanyna öwrüldi.