Fransiýaly meşhur hüjümçi Antuan Grizman şu möwsüm tamamlanandan soň Madridiň «Atletiko» kluby bilen hoşlaşar we karýerasyny ABŞ-nyň «Orlando Siti» toparynda dowam eder. Madridiň kluby tejribeli oýunçynyň tomusda topardan gitjekdigini resmi taýdan tassyklady. Bu waka Grizmanyň Ýewropadaky şöhratly ýolunyň tamamlanmagyny we Amerikanyň MLS ligasynda täze sahypanyň açylmagyny aňladýar.

«Atletiko» toparynyň rugsaty bilen Grizman eýýäm geljekki kluby bilen şertnama baglaşmak üçin Amerikanyň Birleşen Ştatlaryna ugrady. Deslapky maglumatlara görä, taraplar ýyllyk 10 million ýewro aýlyk haky bilen iki ýyllyk ylalaşyk barada dilden ylalaşyk gazandylar. 35 ýaşly hüjümçi üçin bu ädim diňe bir sport bäsleşigi däl, eýsem täze medeniýet we durmuş tejribesi bolar.

Antuan Grizman «Atletiko Madridiň» taryhynda öçmez-ýitmez yz galdyrdy. Ol 2014-nji ýylda kluba gelip, diňe 2019-2022-nji ýyllar aralygynda «Barselonada» oýnan döwrüni hasaba almasaň, ömrüniň iň gowy ýyllaryny Madridde geçirdi. Grizman «Atletikonyň» taryhynda 211 gol bilen iň köp gol geçiren hüjümçi hökmünde rekord goýdy. Şeýle hem ol topar üçin 488 duşuşykda meýdança çykyp, iň köp oýun geçiren oýunçylaryň biri boldy.

Öz karýerasy boýunça Grizman «Atletikonyň» düzüminde Ispaniýanyň Superkubogyny, Ýewropa ligasyny we Ýewropanyň Superkubogyny gazanmagy başardy. Onuň gidişi klubyň janköýerleri üçin uly ýitgi bolsa-da, goýan rekordlary ony Madridiň hakyky rowatyna öwürdi. Indi bolsa dünýä futbolynyň muşdaklary onuň «Orlando Siti» köýnekçesindäki täze oýunlaryna garaşýarlar.