2026-njy ýylyň 9-10-njy iýun günlerinde Türkmenistanyň Fransiýa Respublikasyndaky we Portugaliýa Respublikasyndaky Adatdan daşary we Doly ygtyýarly ilçisi M.Çaryýew Terseýra adasynda (Azor adalary) guralan Portugaliýanyň güni, Kamoens güni we portugal jemgyýetleriniň güni mynasybetli dabaraly döwlet çärelerine gatnaşdy.

Türkmenistanyň Daşary işler ministrliginiň metbugat gullugynyň habar bermegine görä, resmi maksatnamanyň çäklerinde türkmen diplomaty Portugaliýa Respublikasynyň Prezidenti tarapyndan daşary ýurtlaryň diplomatik korpusynyň wekilleri üçin guralan resmi kabul edişlik dabarasyna, Portugaliýanyň Ýaragly Güýçleriniň gatnaşmagynda geçirilen harby dabaralara (parada), şeýle hem milli baýramçylyk mynasybetli guralan beýleki medeni-köpçülikleýin çärelere gatnaşdy.

Dabaranyň dowamynda Türkmenistanyň ilçisi Portugaliýada akkreditirlenen diplomatik wekilhanalaryň ýolbaşçylary bilen bilelikde Portugaliýa Respublikasynyň Prezidenti Antoniu Žoze Seguruny dabaraly ýagdaýda gutlady. Ol Portugaliýanyň döwlet ýolbaşçysyna Türkmenistanyň Prezidenti Serdar Berdimuhamedowyň adyndan milli baýramçylyk mynasybetli mähirli gutlaglaryny hem-de Portugaliýanyň dostlukly halkyna parahatçylyk, abadançylyk we durnukly rowaçlyk baradaky iň gowy arzuw-niýetlerini ýetirdi.

Baýramçylyk çäreleriniň çäklerinde Türkmenistanyň ilçisiniň diplomatik korpusyň beýleki wekilleri hem-de Portugaliýa Respublikasynyň resmi adamlary bilen aýratyn duşuşyklary guraldy. Duşuşyklaryň dowamynda taraplar özara gyzyklanma döredýän sebit we halkara meseleler boýunça pikir alyşdylar, şeýle hem ikitaraplaýyn hyzmatdaşlygy täze sepgitlere çykarmagyň we ösdürmegiň durnukly mümkinçiliklerini ara alyp maslahatlaşdylar.