Meksikanyň Döwlet bilimi ministrligi okuw wagtynyň adatdakysyndan ep-esli gysgaldylmagy barada karar kabul etdi. Ýurtda emele gelen aşa yssy howa şertleri we 2026-njy ýylyň futbol boýunça dünýä çempionatynyň meýilnamasy sebäpli, mekdeplerde okuw ýyly 40 gün ir tamamlanar. Täze tertibe görä, okuwçylaryň howpsuzlygyny üpjün etmek we şäher düzümine düşýän agramy azaltmak maksady bilen, sapaklar iýun aýynyň başynda bes ediler.

Mekdeplerde okuwlar öň meýilleşdirilen 15-nji iýulyň deregine, eýýäm 5-nji iýunda tamamlanar. Bilim edaralarynyň administratiw işgärleri bolsa ähli resminama işlerini 12-nji iýuna çenli bitirmeli bolar. Bilim ministri Mario Delgadonyň bellemegine görä, wagtyň gysgaldylmagyna garamazdan, okuw maksatnamasynda göz öňünde tutulan ähli wezipeler doly berjaý ediler we talyplaryň akademiki ýetişigine hiç hili zyýan ýetmez.

Mugallymlaryň we okuwçylaryň işe we okuwa dolanmak tertibi hem anyklandy: mugallymlar 10-njy awgustda işe başlar. 17-28-nji awgust aralygynda bolsa okuwçylaryň öňki öwrenen bilimlerini berkitmek we täze okuw ýylyna taýýarlyk görmek maksady bilen ýörite çäreler geçiriler. Täze okuw ýylynyň resmi başlangyç güni hökmünde 31-nji awgust bellenildi.

Futbol boýunça dünýä birinjiligi 11-nji iýun — 19-njy iýul aralygynda üç ýurtda, şol sanda Meksikada geçiriler. Meksikanyň Mehiko, Gwadalahara we Monterreý şäherleri bu halkara ýaryşyň oýunlaryny kabul eder. Aşa yssy howanyň saglyga ýetirip biljek zyýanynyň we iri sport çäresiniň guralmagynyň bir wagta düşmegi, mekdepleri möwritinden öň ýapmak baradaky kararyň esasy sebäbi boldy.