Beýik Britaniýanyň 29 ýaşly ýaşaýjysy Meg Eýwon özboluşly başlangyç bilen dünýä metbugatynyň ünsüni çekdi. «Mirror» neşiriniň habar bermegine görä, bu işjeň zenan ýurtdaky Letom derýasy bilen resmi nikalaşmak isleýär. Meg eýýäm birnäçe ýyl bäri bu derýa bilen «gatnaşykdadygyny» aýdyp, tebigaty goramak ugrunda üýtgeşik usul bilen göreşýär.

Häzirki wagtda Meg we derýanyň «bilelikdäki gatnaşyklaryna» üç ýyl doldy. 2023-nji ýylyň iýun aýynda olar simwoliki nika dabarasyny geçirdiler we şondan bäri Meg resmi taýdan derýanyň adyny aňladýan Eýwon familiýasyny göterip başlady. Gyzyň sözlerine görä, bu geň galdyryjy ädim ekologiýa meselelerine, esasanam suw serişdeleriniň hapalanmagyna jemgyýetiň ünsüni çekmek üçin niýetlenendir.

Megiň we onuň eko-toparynyň esasy maksady derýanyň hukuk derejesiniň ykrar edilmegine gazanmakdan ybaratdyr. Eger derýa aýratyn hukuk subýekti hökmünde ykrar edilse, bu diňe bir ony hapalanmakdan resmi derejede goramaga däl, eýsem Megiň derýa bilen kanuny nika baglaşmagyna-da ýol açar. Emma häzirki wagtda Britaniýanyň kanunçylygy beýle resmi nikany ykrar etmäge heniz taýyn däl.

Bu täsirli waka tebigat bilen adamyň arasyndaky baglanyşygyň täze görnüşlerini görkezýär. Meg Eýwon özüniň bu hereketiniň üsti bilen dünýäniň ähli künjeklerinde derýalaryň we suw çeşmeleriniň goragynyň güýçlendirilmelidigini ýatladýar. Şeýle çäreler medeni we ekologiýa taýdan tebigata bolan garaýşyň üýtgemegine itergi berýär.