Oýun sanawy
Hindi ýazyjysy diňe 2114-nji ýyla ýetilende okalyp bilinjek kitaby ýazar
Meşhur hindi ýazyjysy Amitaw Goş “Geljegiň kitaphanasy” taslamasynyň 12-nji gatnaşyjysy boldy. Onuň indiki golýazmasy, 2114-nji ýyla çenli, ýagny 89 ýyllap okyjylar üçin elýeterli bolmaz diýip, The Guardian habar berýär.
Taslama 2014-nji ýylda şotlandiýaly suratkeş Keti Petersonyň başlangyjy esasynda işe girizildi. Şol döwürde Oslonyň demirgazygynda müň sany arça agajy oturdylypdy. Ýüz ýyldan soň bu agaçlar "Geljegiň kitaphanasy" antologiýasynyň 100 eserini çap etmek üçin ulanylar. Bu taslama Margaret Etwud, Dewid Mitçel, Ouşen Wuong, Nobel baýragynyň eýesi Han Gan we beýlekiler ýaly dünýä belli romançylar goşuldy. Häzirlikçe bir nusgada bolan ähli tekstler Oslo jemgyýetçilik kitaphanasynyň ýörite "asuda otagynda" saklanýar.
Goş başlangyja gatnaşmaga çakylygy “çuňňur hormat we tolgundyryjy ynam” diýip atlandyrdy. Onuň sözlerine görä, taslama "bizi ömrümiziň çäklerinden çykyp pikirlenmäge, heniz dünýä inmedik okyjylary göz öňüne getirmäge mejbur edýär".
Goş: "Men şeýle düýpli gerimlerde ekologiýany, edebiýaty we sabyrlylygy birleşdirýän eseriň bir bölegi bolandygyma tolgunýaryn" - diýdi.
Ýazyjy golýazmany 2026-njy ýylyň maýynda ýa-da iýun aýynda “Geljegiň kitaphanasy” tokaýynyň kitaphanasynda hödürlär. Kitabyň ady hem şonda aýan bolar.
Amitaw Goş döwrümiziň kän agzalýan hindi ýazyjylaryndan biridir. Onuň iň meşhur kitaplary “Aýna köşk” (“Стеклянный дворец”) we “Ibisli trilogiýa” (“Ибисная трилогия”). Beýleki zatlar bilen birlikde, ýazyjy eserlerinde, köplenç, klimat krizisi meselesini gozgaýar.
Şeýle hem okanyň
Iň köp görülen
Türkmenistan «Bitewi saglyk» taslamasynyň çäklerinde sebitleýin hyzmatdaşlygy güýçlendirýär
29-31-nji oktýabr aralygynda Täjigistanyň paýtagty Duşenbede «Pandemiýalaryň öňüni almak, azyk howpsuzlygyny hem-de ekoulgamlaryň sagdynlygyny üpjün etmek üçin Merkezi Aziýada “Bitewi saglyk”» atly taslamanyň ilkinji sebitleýin maslahaty we Sebitleýin utgaşdyryş geňeşiniň mejlisi geçirildi. Bu barada Türkmenistanyň Oba hojalyk ministrliginiň Döwlet weterinariýa gullugy habar berdi.
Maslahata Merkezi Aziýa ýurtlarynyň hökümetleriniň we degişli ministrlikleriniň wekilleri, şeýle hem halkara guramalar we ösüş boýunça hyzmatdaşlar gatnaşdylar. Türkmenistanyň wekiliýeti oba hojalyk, saglygy goraýyş we derman senagaty, daşky gurşawy goramak, şeýle hem maliýe we ykdysadyýet ministrlikleriniň hünärmenlerinden ybarat boldy.
Umumy mejlisde Türkmenistanyň Oba hojalyk ministrliginiň adyndan Döwlet weterinariýa gullugynyň halkara we ylmy aragatnaşyklar bölüminiň müdiri Arslan Soltanmyradow çykyş etdi. Ol Türkmenistanyň Prezidentiniň ýolbaşçylygynda durnukly ösüş ugrunyň yzygiderli durmuşa geçirilýändigini, ilatyň saglygyna, haýwanat dünýäsiniň goralmagyna hem-de ekologiýa howpsuzlygyna aýratyn üns berilýändigini belledi.
A.Soltanmyradowyň bellemegine görä, «Bitewi saglyk» konsepsiýasy azyk howpsuzlygyny üpjün etmäge, mallardan adamlara geçýän keselleriň (zoonozlaryň) öňüni almaga we weterinariýa-sanitariýa abadançylygyny pugtalandyrmaga gönükdirilendir. Ol Türkmenistanyň bu ugurda edaralaryň we sebit ýurtlarynyň arasyndaky hyzmatdaşlyga işjeň gatnaşýandygyny nygtady.
Maslahat, ýurtlaryň arasynda tejribe alyşmak, bilelikdäki çäreleri utgaşdyrmak hem-de sebitleýin hyzmatdaşlygy ösdürmek üçin meýdança öwrüldi. Gatnaşyjylar Sebitleýin utgaşdyryş geňeşiniň işiniň ýola goýluşyny we taslamany ýerine ýetirmäge goldaw berjek tehniki iş toparlaryny döretmek meselelerini ara alyp maslahatlaşdylar.
Forumyň gatnaşyjylary Türkmenistanyň «Bitewi saglyk» ulgamynyň ösdürilmegine goşan möhüm goşandyny bellediler we Merkezi Aziýa ýurtlarynyň bilelikdäki tagallalarynyň dünýä derejesinde biologik we azyk howpsuzlygyny üpjün etmäge mynasyp goşant goşjagyna ynam bildirdiler.
Blitz