Londonyň meşhur «Chessington World of Adventures» dynç alyş merkeziniň çäginde 2027-nji ýylda dünýäde ilkinji gezek «Minecraft» wideo oýnunyň ähenindäki uly göwrümli tematiki seýilgäh açylar. «Variety» neşiriniň habar bermegine görä, bu täsin taslamanyň gurluşyk işleri üçin takmynan 70 million dollar möçberinde maýa goýum goýulmagy meýilleşdirilýär.

Taslamany amala aşyrmak üçin oýnuň awtory bolan «Mojang Studios» hem-de dünýäniň öňdebaryjy dynç alyş merkezlerini dolandyrýan «Merlin Entertainments» kompaniýalary özara hyzmatdaşlyk ederler. Bu seýilgäh ähli döwürleriň iň köp satylan wideo oýnuny wirtual giňişlikden fiziki dünýä geçirmekde taryhy ädim bolar. Taslamanyň awtorlary «Minecraft» äleminiň özboluşly blokly gurluşyny we gurşawyny hakyky durmuşda janlandyrmagy maksat edinýärler.

Seýilgähiň meýilnamasynda diňe bir döwrebap attraksionlar däl, eýsem oýundaky sýužetlere esaslanan interaktiw kwestler we bloklar stilinde bezelen ýörite oýun zolaklary hem ýerleşer. Şeýle hem, gelýän myhmanlar üçin oýnuň ähenindäki tematiki dükanlar we üýtgeşik dizaýnly restoranlar hyzmat eder. Bu ýer oýnuň muşdaklary üçin wirtual dünýäniň hakyky duýgularyny başdan geçirmäge mümkinçilik berer.

«Minecraft World» taslamasy diňe bir çagalar üçin däl, eýsem bu oýnuň millionlarça ýaş we uly ýaşly muşdaklary üçin hem iň gyzykly dynç alyş merkezleriniň birine öwrüler diýlip garaşylýar. Londonyň syýahatçylyk pudagyna täze itergi berjek bu taslama, sanly dünýä bilen hakyky durmuşyň utgaşmasynyň täze nusgasyny görkezer.