Bütindünýä Saglygy Goraýyş Guramasynyň (BSGG) bilmenleri hantawirus ýokanjynyň dünýä derejesinde giň gerimli ýaýramak ähtimallygynyň örän pesdigini tassykladylar. Guramanyň Ýewropa edarasynyň ýolbaşçysy Hans Klýuge jemgyýetçilik torlary arkaly beren beýanatynda häzirki wagtda bu mesele boýunça uly howsalanyň ýokdugyny belledi. Onuň aýtmagyna görä, epidemiologik ýagdaý doly gözegçilikde saklanylýar we ilat üçin düýpli töwekgelçilikler anyklanmady.

Hantawirusyň özboluşly aýratynlygy barada durup geçmek bilen, hünärmenler bu ýokanjyň adamdan adama geçmek häsiýetiniň pesdigini nygtadylar. Keseliň ýokuşma çeşmesi adatça daşky gurşaw we tebigy ojaklar bilen gönüden-göni baglydyr. BSGG-niň wekili käbir ýagdaýlarda keseliň agyr geçip bilýändigine garamazdan, onuň epidemiýa öwrülmek ähtimallygynyň ýokdugyny, şonuň üçin halkara syýahatlaryna ýa-da söwda gatnaşyklaryna hiç hili çäklendirmeleriň gerek däldigini aýratyn belledi.

Soňky günlerde halkara habar serişdelerinde syýahatçylyk gämileriniň birinde ýokanç keseliň birnäçe ýagdaýynyň hasaba alynmagy jemgyýetçilikde gyzyklanma döredipdi. Hususan-da, «MV Hondius» gämisinde bolan hadysa saglygy goraýyş edaralarynyň ünsüni çekdi. Muňa garamazdan, BSGG bu wakanyň lokallaşdyrylandygyny we onuň umumy dünýä saglygy goraýyş ulgamyna wehim salmaýandygyny tassyklaýar.

Lukmançylyk ylmyna görä, bu ýokanjyň esasy çeşmesi hökmünde gemrijiler görkezilýär. Keseliň ýokuşmagy esasan arassaçylyk kadalarynyň pes bolan we ýeterlik derejede şemalladylmaýan ýapyk binalarda mümkindir. Saglygy goraýyş hünärmenleri binalaryň arassaçylygyna üns bermegi we ýapyk ýerleri yzygiderli şemalladyp durmagy esasy öňüni alyş çäreleri hökmünde maslahat berýärler.