German awtomobil öndürijisi Volkswagen we onuň golçur kompaniýasy Audi rul mehanizmindäki hyrly birleşdirijide ýüze çykyp biljek çiddi näsazlyklar sebäpli bütin dünýä boýunça 2,1 milliondan gowrak ulagyny yzyna çagyrýandygyny yglan etdi. Umumygerman awtomobil klubynyň (ADAC) berýän maglumatlaryna görä, atalgy näsazlyk ulagyň rul dolandyryş ulgamynyň doly hatardan çykmagyna we ýol-ulag hadysalarynyň döremegine getirip biler.

Yzyna çagyryş kampaniýasy 2017-nji ýylyň 31-nji oktýabryndan 2024-nji ýylyň 23-nji maýyna çenli öndürilen Audi Q3, şeýle hem 2013-nji ýylyň 24-nji sentýabryndan 2024-nji ýylyň 1-nji iýulyna çenli çykarylan VW Golf, Golf Variant, Tiguan, Touran we Caddy modellerini öz içine alýar. Öndürijiniň resmi düşündirişine görä, käbir ýagdaýlarda poslama sebäpli rul mehanizminiň hyrly birleşdirijisindäki bolt döwülmäge we ulagyň dolandyryşyny kynlaşdyrmaga ukyplydyr.

Ady agzalan awtoulaglaryň eýelerine gyssagly ýagdaýda ýöriteleşdirilen servis merkezlerine we awtoulag ussahanalaryna ýüz tutmak maslahat berilýär. Şol ýerde hünärmenler tarapyndan rul mehanizminiň hyrly birleşdirijisi barlanar hem-de näsaz şaylar poslama durnukly täze görnüşleri bilen mugt çalşyrylar.

Şeýle hem үstümizdäki ýylyň sentýabr aýynda Volkswagen kompaniýasy ABŞ-nyň bazarynda 208,7 müňden gowrak awtomobilini yzyna çagyrypdy. Şol wagtky kampaniýa 2018-nji ýylda çykarylan Tiguan, 2018–2019-njy ýyllaryň Atlas we 2019–2021-nji ýyllaryň Audi Q3 modellerine degişli bolup, ol hem rul reýkasynyň boltunyň möhletinden öň poslamagy hem-de döwülmek töwekgelçiligi bilen baglanyşdyrylypdy.