2026-njy ýylyň 19 — 22-nji awgusty aralygynda Türkmenistanyň paýtagtynda «KIDS EXPO 2026: Hemme zat çagalar üçin» atly halkara sergi-ýarmarkasy geçiriler. Bu iri çärä BMG-niň Çagalar gaznasynyň (ÝUNISEF) Türkmenistandaky wekilligi işjeň gatnaşar. Serginiň guramaçylary hökmünde Türkmenistanyň Söwda-senagaty edarasy we «Türkmen Ekspo» kompaniýasy çykyş edýärler. Bu çäre döwlet edaralarynyň, halkara guramalarynyň, işewürlik we bilim jemgyýetçiliginiň hem-de çagalar ulgamynda zähmet çekýän hünärmenleriň başyny birleşdirer.

Serginiň işewürlik maksatnamasynyň çäklerinde halkara guramasy çagalaryň irki ösüşi, saglygy we iýmitlenişi boýunça giňişleýin bilim maksatnamasyny hödürlär. Bu okuw maslahatlary ene-atalar, gelejekki ene-atalar, degişli ulgamyň hünärmenleri we çagalaryň saglygy bilen gyzyklanýanlar üçin niýetlenendir. ÝUNISEF-iň halkara hünärmenleri we maslahatçylary dünýä tejribesine esaslanan döwrebap maslahatlary hem-de amaly bilimleri paýlaşarlar.

Maksatnama bäş sany esasy temany öz içine alýar: «Ömrüň ilkinji 1000 güni: her bir çaga üçin iň gowy başlangyç», «Ynamly göwüs emdirme», «Sazlaşykly ösüş üçin iýmitlenme: ilkinji goşmaça iýmitlerden soňky iýmitlenme», «Çagalardaky alada döredýän alamatlar: haçan lukmançylyk kömeginden peýdalanmaly» we «Çaganyň beýnisiniň ösüşi we pozitiw ene-atalyk». Gatnaşyjylar irki ösüşiň, dogry iýmitlenmegiň we maşgalada amatly gurşawy döretmegiň esasy ýörelgeleri bilen tanşyp bilerler.

ÝUNISEF-iň bilim maksatnamasy KIDS EXPO 2026 sergisiniň möhüm bölegine öwrülip, milli we halkara hünärmenleriň arasynda tejribe alyşmaga mümkinçilik döreder. Goşmaça maglumat almak we guramaçylyk meseleleri boýunça habarlaşmak üçin guramaçylyk komiteti contact@turkmenexpo.com elektron poçta salgysyny hem-de +993 71 87 18 12, +993 63 50 15 51 telefon belgilerini hödürleýär.