Ýurdumyzyň ýangyç-energetika toplumynyň kärhanalary we önümçilik düzümleri tarapyndan 2026-njy ýylyň ýanwar — maý aýlarynda gazanylan ykdysady görkezijiler jemlenildi. Sanly ulgam arkaly guralan hökümet mejlisinde wise-premýer G.Agajanowyň hasabatynda bellenilişi ýaly, «Türkmennebit» döwlet konserni tarapyndan hasabat döwründe nebit çykarmagyň meýilnamasy 107,6 göterim derejesinde üpjün edildi. Bu bolsa pudakda işleriň döwrebap guralýandygynyň aýdyň subutnamasydyr.

Nebitgaz toplumynyň gaýtadan işleýän kärhanalary tarapyndan hem ýokary önümçilik sepgitlerine ýetildi. Hasabat döwründe nebiti gaýtadan işlemegiň umumy meýilnamasy 104,6 göterim berjaý edildi. Pudaklaýyn kärhanalar tarapyndan dünýä standartlaryna laýyk gelýän taýýar nebit önümlerini öndürmekde uly netijeler gazanyldy: benzin öndürmek 110 göterim, dizel ýangyjyny öndürmek 110,4 göterim, dürli görnüşli çalgy ýaglaryny öndürmek 124,1 göterim hem-de halkara bazarlarynda uly isleg bildirilýän suwuklandyrylan gazy öndürmek meýilnamasy 111,4 göterim ýerine ýetirildi. Şeýle-de, tebigy we ugurdaş gazy çykarmagyň meýilnamasy 106,6 göterim amal edildi.

Milli ykdysadyýetimiziň lokomotiwi bolan ýangyç-energetika toplumynyň durnukly ösmegi ýurdumyzyň eksport kuwwatyny has-da berkidýär. Önümçilik desgalaryna täze tehnologik enjamlaryň ornaşdyrylmagy daşary ýurtlardan getirilýän harytlaryň ornuny tutýan we bäsdeşlige ukyply ýokary hilli ýangyç serişdelerini köpçülikleýin öndürmäge giň mümkinçilikleri döredýär. Geljekde bu önümleriň daşarky bazarlara iberilýän ugurlaryny has-da giňeltmek göz öňünde tutulýar.

Döwlet Baştutanymyz hasabaty diňläp, ýurtda tebigy gazyň we nebitiň çykarylýan möçberlerini yzygiderli artdyrmagyň, milli ykdysadyýetiň durnuklylygyny üpjün etmekde we salgyt girdejilerini artdyrmakda uly ornunyň bardygyny nygtady. Prezident Serdar Berdimuhamedow senagat desgalarynyň doly kuwwatynda we bökdençsiz işledilmegini gözegçilikde saklamagy tabşyrdy. Şeýle hem, wise-premýere täze ýataklary ýüze çykarmak maksady bilen, geologiýa-gözleg we buraw işleriniň netijeliligini has-da ýokarlandyrmak barada anyk görkezmeler berildi.