Türkmenistanyň Mejlisiniň ýedinji çagyrylyşynyň on ikinji maslahatynda döwlet ähmiýetli birnäçe möhüm çözgütler kabul edildi. Maslahatyň dowamynda halkara ölçeglerine laýyklykda kämilleşdirilen täze kanun taslamalary ara alnyp maslahatlaşyldy we olar biragyzdan tassyklanyldy. Şeýle hem ýakynda geçirilen saýlawlaryň netijeleri esasynda täze saýlanan deputatlaryň ygtyýarlyklary resmi taýdan ykrar edildi we parlament komitetleriniň düzümi täzelendi.

Kabul edilen täze kanunçylyk namalary ykdysadyýet, maliýe we senagat howpsuzlygy ýaly strategik ugurlary öz içine alýar. Hususan-da, Administratiw hukuk bozulmalary, buhgalterçilik hasaba alnyşy, migrasiýa we balyk tutmak pudaklaryna degişli kanunlara girizilen üýtgetmeler ýurduň hukuk binýadyny döwrebaplaşdyrmaga gönükdirilendir. Bu özgertmeler milli ykdysadyýetiň durnukly ösmegine we döwlet dolandyryşynyň netijeliligini ýokarlandyrmaga ýardam eder.

Maslahatyň gün tertibinde adam hukuklaryny goramak meselesine hem aýratyn orun berildi. Türkmenistanda adam hukuklary boýunça ygtyýarly wekil — Adalatçy öz edarasynyň alyp baran işleri we ýurtda adam hukuklarynyň berjaý edilişi barada hasabat bilen çykyş etdi. Bu hasabat parlamentde demokratik prinsipleri we halkara ynsanperwerlik kadalaryny durmuşa geçirmek ugrunda alnyp barylýan işleriň aýdyň görkezijisidir.

Parlamentiň maslahatynda Türkmenistanyň Garaşsyzlygynyň 35 ýyllygyna görülýän taýýarlyk we parlamentara diplomatiýasyny ösdürmek meselelerine hem seredildi. Deputatlar dünýä döwletleriniň parlamentleri we halkara guramalary bilen tejribe alyşmagyň ähmiýetini nygtadylar. Ýurduň parahatçylyk söýüji daşary syýasatyny wagyz etmek we global derejede özara ynanyşmagy pugtalandyrmak parlamenaryň öňünde duran esasy wezipeleriň biri hökmünde bellenildi.