5-8-nji maý aralygynda Nýu-Ýorkda, Birleşen Milletler Guramasynyň ştab-kwartirasynda geçirilen Migrasiýa meselelerine syn bermek boýunça ikinji halkara forumda Türkmenistanyň Döwlet migrasiýa gullugynyň başlygy Amanmuhammet Sazakow çykyş etdi. Ol öz çykyşynda Türkmenistanyň halkara hukugynyň kadalaryna, şol sanda BMG-niň Tertipnamasyna we ynsanperwerlik ýörelgelerine ygrarlydygyny nygtady. Ýurdumyz Migrasiýa baradaky Ählumumy ylalaşygyň maksatlaryny milli meýilnamalaryna işjeň ornaşdyrmak bilen, bu ugurda nusgalyk tejribäni kemala getirýär.

Häzirki wagtda Türkmenistanda şahsyýeti tassyklaýan resminamalar ulgamy halkara ülňülere laýyklykda yzygiderli kämilleşdirilýär. Döwlet migrasiýa gullugy tarapyndan berilýän biometrik pasportlar we ýaşamak üçin ygtyýarnamalar Halkara raýat awiasiýasy guramasynyň (ICAO) ýokary talaplaryna doly jogap berýär. Bu resminamalaryň köp derejeli gorag ulgamy bilen üpjün edilmegi, migrasiýa akymlarynyň kanunylaşdyrylmagyna we maglumatlaryň howpsuzlygynyň üpjün edilmegine hyzmat edýär.

Forumyň dowamynda Türkmenistanyň Prezidentiniň BMG-niň Baş Assambleýasynda öňe süren Sanly integrasiýa boýunça bütindünýä platformasyny döretmek baradaky başlangyjyna aýratyn orun berildi. Bu taslama migrasiýa amallaryna sanly tehnologiýalary ornaşdyrmak arkaly, halkara hyzmatdaşlygy täze derejä çykarmagy maksat edinýär. Sanly platforma maglumat alyş-çalşygyny çaltlandyrmaga we döwletara gatnaşyklarda ynanyşmak ýörelgelerini berkitmäge ýardam eder diýlip garaşylýar.

Bu halkara forum migrasiýa meseleleri boýunça öňdebaryjy tejribeleri alyşmak üçin möhüm hökümetara meýdança boldy. Oňa BMG-ä agza döwletleriň wekilleri bilen bir hatarda, Halkara migrasiýa guramasynyň we beýleki ýöriteleşdirilen düzümleriň ýolbaşçylary gatnaşdylar. Türkmen tarapy migrasiýa ulgamyndaky halkara şertnamalaýyn-hukuk binýadyny giňeltmäge we durnukly ösüş maksatlaryna ýetmek ugrunda global başlangyçlara goşant goşmaga taýýardygyny ýene bir gezek tassyklady.