Aşgabat şäherindäki Ýöriteleşdirilen küşt we şaşka mekdebinde geçirilen saýlama ýaryşy öz wagtynda tamamlandy. Bu ýaryşyň esasy maksady türki döwletleriň arasynda geçiriljek taryhy birinji küşt olimpiadasynda ýurdumyzyň namysyny gorajak 16 ýaşa çenli zehinli ýaşlaryň düzümini kesgitlemekden ybarat boldy. Bäsleşige ýurdumyzyň ähli welaýatlaryndan jemi 49 sany ýaş küştçi gatnaşyp, olar özara iň güýçli bäşligi saýlamak ugrunda bäsleşdiler.

Saýlama tapgyry halkara kadalara laýyklykda, şweýsar ulgamy boýunça 9 tapgyrdan ybarat boldy. Her bir küştçä oýun üçin 45 minut wagt berlip, her bir göçüm üçin goşmaça 30 sekunt wagt hasaplandy. Ýaryşyň netijeleri boýunça ýygyndy toparyň düzümine Ali Ahmedow (7 utuk), Ahmet Artykow (7 utuk), Gurbanmyrat Rüstemow (6,5 utuk), Dilber Hupbyýewa (6,5 utuk) we Zalina Iminowa (6,5 utuk) dagylar girmegi başardylar.

Türki döwletleriň ilkinji küşt olimpiadasy 2026-njy ýylyň 13—18-nji maýy aralygynda Gazagystanyň taryhy Türküstan şäherinde geçiriler. Bu iri sport forumyna Türkmenistan bilen bir hatarda Azerbaýjanyň, Gazagystanyň, Gyrgyzystanyň, Türkiýäniň we Özbegistanyň iň güýçli ýaşlar toparlary gatnaşar. Şol bir wagtyň özünde, Almaty şäherinde uly ýaşly küştçüleriň arasynda hem halkara ýaryşlar guralar, olar Samarkantda geçiriljek 46-njy Bütindünýä küşt olimpiadasyna möhüm taýýarlyk tapgyry bolar.

Türkmenistanyň bu halkara sport çärelerine işjeň gatnaşmagy ýurduň Türki küşt assosiasiýasyny döretmekdäki başlangyçlary bilen hem berk baglydyr. Ýeri gelende ýatlasak, bu guramany döretmek baradaky Ähtnama 2025-nji ýylyň 20-nji oktýabrynda Astanada gol çekilipdi. Ýaş küştçülerimiziň öňde duran olimpiadadaky çykyşlary diňe bir sport ýeňişleri däl, eýsem doganlyk halklaryň arasyndaky medeni we dostlukly gatnaşyklaryň has-da berkemegine hyzmat eder.