Türkmenistanyň futbol boýunça milli ýygyndysy Tailandyň paýtagty Bangkok şäherine baryp ýetdi. 31-nji martda bu ýerde Aziýa Kubogy — 2027-niň saýlama tapgyrynyň iň soňky we iň ähmiýetli duşuşygy geçiriler. Rowşan Meredowyň şäkirtleri «Rajamangala» stadionynda meýdançanyň eýeleri bolan Tailandyň ýygyndysy bilen duşuşarlar. Bu oýun Saud Arabystanynda geçiriljek Aziýa Kubogyna göni ýollanma aljak topary kesgitlär.

Häzirki wagtda «D» toparçasynda örän dartgynly ýagdaý emele geldi. Iki esasy bäsdeş hem 12 utuk toplap, deň derejede barýarlar. Şunwa garamazdan, Türkmenistanyň ýygyndysy goşmaça görkezijiler boýunça birinji oruny eýeleýär. 2025-nji ýylyň iýun aýynda Aşgabatda geçirilen ilkinji duşuşykda türkmen futbolçylarynyň 3:1 hasabynda gazanan ynamly ýeňşi häzirki wagtda uly artykmaçlyk berýär.

Toparçanyň beýleki agzalary bolan Şri-Lanka (6 utuk) we Hytaý Taýbeýi (0 utuk) eýýäm esasy ýaryşdan çykdylar. Şonuň üçin Bangkokdaky duşuşyk hakyky "final" häsiýetine eýedir. Türkmenistanyň ýygyndysyna birinji orny saklap galmak we ýollama gazanmak üçin hatda deňme-deň oýnamak hem ýeterlikdir. Emma Tailandyň ýygyndysy diňe ýeňiş gazanan ýagdaýynda öňe saýlanyp biler.

Duşuşyk Aşgabat wagty bilen sagat 17:30-da başlanar. Milli ýygyndymyz Bangkokda ýokary derejeli taýýarlyk tapgyryny geçýär we janköýerlerimiziň garaşýan taryhy ýeňşini gazanmagy maksat edinýär. Bu oýun Türkmenistanyň futbol abraýyny halkara giňişliginde täze belentliklere götermek üçin möhüm ädim bolar.