Türkmenistanyň Daşary işler ministrliginde daşary işler ministriniň orunbasary Mähri Bäşimowa bilen Amerikanyň Birleşen Ştatlarynyň Türkmenistandaky wagtlaýyn işler ynanylan wekili Kristin Hokinsiň arasynda diplomatik duşuşyk geçirildi. Gepleşikleriň dowamynda taraplar ikitaraplaýyn hyzmatdaşlygyň häzirki ýagdaýyna baha berip, ikitaraplaýyn gatnaşyklary mundan beýläk-de ösdürmegiň esasy ugurlaryny kesgitlediler.

Gepleşikleriň gidişinde halkara guramalaryň, ilkinji nobatda bolsa Bütindünýä bileleşiginiň — BMG-niň çäklerindäki köptaraplaýyn hyzmatdaşlyga aýratyn üns berildi. Taraplar sebit we global derejedäki wajyp meseleler boýunça halkara meýdançalarda bilelikdäki tagallalary utgaşdyrmagyň möhümdigini nygtadylar.

İkitaraplaýyn hyzmatdaşlygyň çäklerinde ynsanperwer ulgamdaky gatnaşyklary berkitmek meseleleri giňişleýin seredildi. Şol sanda bilim we sport ugurlary boýunça gatnaşyklary bökdençsiz ösdürmek, bilim maksatnamalaryny we bilelikdäki taslamalary durmuşa geçirmek boýunça özara pikir alyşyldy.

Duşuşygyň soňky böleginde öňde durýan bilelikdäki çäreleri guraşdyrmagyň amaly we guramaçylyk meselelerine seredildi. Diplomatlar iki döwletiň arasyndaky hyzmatdaşlyk taslamalaryny yzygiderli durmuşa geçirmäge we ikitaraplaýyn gepleşikleri durnukly saklamaga taýýardyklaryny tassykladylar.