1-nji sentýabrda Türkmenistanda däp bolşy ýaly Bilim we talyp ýaşlar güni giňden bellendi we täze okuw ýyly başlandy. Ýurduň ähli mekdeplerinde ilkinji jaň kakylyp, dabaralar Garaşsyzlyk binasyna we Arkadag şäherindäki hem-de Yzgant obasyndaky Berdimuhammet Annaýewiň ýadygärliklerine gül goýmak bilen başlandy.

Orta we ýokary okuw mekdeplerinde Prezident Serdar Berdimuhamedowyň ýaşlara bilimde we ylmy işde üstünlik arzuw eden Gutlag haty okaldy.

Täze okuw ýylynyň ilkinji sapagy Bütindünýä Parahatçylyk we Ynam ýylyna hem-de Türkmenistanyň Bitaraplygynyň 30 ýyllygyna bagyşlandy.

Baýramçylyk mynasybetli Aşgabatda we Lebap welaýatynda 2800 orunlyk 4 sany täze mekdep hem-de 1120 orunlyk 4 sany çagalar bagy açyldy. Şol gün, däp boýunça, ilkinji synp okuwçylaryna “Bilimli” kompýuterleri gowşuryldy.