Russiýa Federasiýasynda resmi iş saparynda bolýan Türkmenistanyň Mejlisiniň Başlygy D.Gulmanowa Russiýanyň Federal Ýygnagynyň Federasiýa Geňeşiniň Başlygy W.Matwiýenko bilen duşuşyk geçirdi. Bu duşuşyk Garaşsyz Döwletleriň Arkalaşygynyň Parlamentara Assambleýasynyň 60-njy gün tertipli mejlisiniň hem-de guramanyň Geňeşiniň nobatdaky maslahatynyň çäklerinde guraldy. Taraplar ikitaraplaýyn parlament gatnaşyklarynyň häzirki ýagdaýyny we geljegini ara alyp maslahatlaşdylar.

Gepleşikleriň barşynda iki ýurduň Baştutanlarynyň syýasy erki netijesinde türkmen-rus gatnaşyklarynyň strategik häsiýete eýe bolandygy aýratyn bellenildi. Taraplar köpýyllyk baý tejribä esaslanýan hyzmatdaşlygyň syýasy, ykdysady we medeni-ynsanperwer ugurlarda netijeli ösdürilýändigini tassykladylar. Şeýle hem döwletara gatnaşyklary has-da kämilleşdirmekde parlament diplomatiýasynyň tutýan orny barada durlup geçildi.

Gelejekde kanun çykaryjylyk işinde tejribe alyşmagyň durnukly ulgamyny döretmek duşuşygyň esasy temalarynyň biri boldy. Parlamentara dostluk toparlarynyň işini has-da utgaşdyrmak, halkara meýdançalarda birek-biregiň öňe sürýän halkara başlangyçlaryny goldamak we parlament derejesindäki duşuşyklary yzygiderli geçirmek barada möhüm ylalaşyklar gazanyldy.

Mejlisiň Başlygy D.Gulmanowa rus kärdeşi W.Matwiýenkony Türkmenistanyň GDA-da başlyklyk etmeginiň hem-de Merkezi Aziýanyň we Azerbaýjanyň döwlet Baştutanlarynyň Konsultatiw duşuşygynyň çäklerinde guraljak halkara çärelere gatnaşmaga çagyrdy. Bu abraýly çäreleriň «Awaza» milli syýahatçylyk zolagynda geçirilmegi meýilleşdirilýär.