Şu günler Ženewa şäherinde geçirilýän Halkara zähmet maslahatynyň 114-nji sessiýasynyň meýdançasynda Türkmenistanyň zähmet we ilaty durmuş taýdan goramak ministri M.Sylapow bilen Halkara zähmet guramasynyň (HZG) Baş direktory Gilbert Hungbonyň arasynda ýokary derejeli duşuşyk guraldy. Döwletara derejedäki bu duşuşyk zähmet gatnaşyklaryny kämilleşdirmek boýunça amala aşyrylýan halkara hyzmatdaşlygyň çäklerindäki nobatdaky möhüm ädim boldy.

Gepleşikleriň dowamynda taraplar durmuş-zähmet ulgamyndaky ikitaraplaýyn gatnaşyklaryň häzirki ýagdaýyny seljerdiler we özara bähbitli hyzmatdaşlygyň täze ugurlaryny kesgitlediler. Esasy üns dünýä tejribesinde durmuşa geçirilýän iň gowy usullary milli kanunçylyga we durmuş syýasatyna ornaşdyrmak meselelerine gönükdirildi.

Şeýle-de, duşuşykda HZG-niň halkara giňişliginde alyp barýan strategik maksatnamalarynyň çäginde Türkmenistanda durmuşa geçirilip bilinjek taslamalar barada giňişleýin pikir alyşyldy. Ministrligiň we guramanyň ýolbaşçylary ilaty durmuş taýdan goramak, guramaçylykly zähmet bazaryny emele getirmek we raýatlaryň zähmet hukuklaryny üpjün etmek boýunça täze çäreleri ara alyp maslahatlaşdylar.

Halkara gepleşikleriň jemleri boýunça iki tarap hem özara ynanyşmak we netijelilik ýörelgelerine esaslanýan işjeň dialogy dowam etdirmäge taýýardyklaryny tassykladylar. Öňde goýlan bilelikdäki maksatlara ýetmek üçin anyk meýilnamalary we taslamalary yzygiderli durmuşa geçirmek barada özara ylalaşyk gazanyldy.