Şu gün Türkmenistanyň Mejlisiniň binasynda Türkmenistanyň we Koreýa Respublikasynyň parlamentara dostluk toparlarynyň duşuşygy geçirildi. Mejlisiň habar berşi ýaly, duşuşygyň esasy maksady iki ýurduň kanun çykaryjy edaralarynyň arasyndaky dostluk toparlarynyň işini kämilleşdirmekden hem-de ugurdaş komitetleriň derejesinde gatnaşyklary ýola goýmakdan ybarat boldy.

Gepleşikleriň dowamynda taraplar döwlet Baştutanlarynyň tagallalary netijesinde türkmen-koreý hyzmatdaşlygynyň syýasy-ykdysady, medeni-ynsanperwer we parlamentara ugurlarda uly ösüşlere eýe bolandygyny nygtadylar. Şeýle hem ikitaraplaýyn gatnaşyklaryň halkara guramalaryň çäklerinde hem özara goldaw bermek arkaly yzygiderli pugtalandyrylýandygy bellenildi.

Duşuşykda söwda-ykdysady, ýangyç-energetika, ulag-logistika, sanlylaşdyrma, ýokary tehnologiýalar we gämi gurluşygy ýaly ugurlarda hyzmatdaşlygy has-da ösdürmegiň ähmiýeti bellenildi. Şunda ylym-bilim ulgamyndaky gatnaşyklara, hususan-da, Döwletmämmet Azady adyndaky Türkmen milli dünýä dilleri institutynda hem-de orta mekdeplerde koreý diliniň öwredilmegine, türkmen ýaşlarynyň Koreýanyň ýokary okuw mekdeplerinde bilim almagyna ýokary baha berildi. Taraplar dostlukly gatnaşyklaryň geljekde hem parlament diplomatiýasy arkaly işjeňleşdiriljekdigine ynam bildirdiler.