Türkmenistanyň Ministrler Kabinetiniň nobatdaky mejlisiniň dowamynda wise-premýer B. Seýidowa geljek aýda ýurdumyzda durmuşa geçiriljek esasy jemgyýetçilik we medeni taslamalaryň meýilnamasy barada hasabat berdi. Döwlet derejesinde guraljak çäreleriň gysgaça tertibi medeniýet, sport, ylym we halkara hyzmatdaşlyk ýaly ugurlary öz içine alyp, olar jemgyýetçilik durmuşyny baýlaşdyrmaga gönükdirilendir.

Maksatnama laýyklykda, tomus paslynyň ilkinji aýynda Çagalary goramagyň halkara güni, Bütindünýä welosiped güni hem-de Daşky gurşawy goramagyň bütindünýä güni mynasybetli dabaralar guralar. Şeýle-de, Ylymlar güni, Medeniýet we sungat işgärleriniň hem-de Magtymguly Pyragynyň şygryýet güni mynasybetli ylmy-amaly maslahatlar, döredijilik duşuşyklary we sport bäsleşikleri geçiriler.

Halkara hyzmatdaşlygy ösdürmek çäklerinde paýtagtymyzda Azerbaýjan Respublikasynyň Medeniýet günlerini, halkara derejeli olimpiadalary we sergileri guramak meýilleşdirilýär. Şonuň bilen birlikde, ýurdumyzyň welaýatlarynda «Çalsana, bagşy!» atly gözden geçirilişiň jemleýji tapgyrlary hem-de ýokary okuw mekdepleriniň talyplarynyň arasynda «Talyp joşguny – 2026» festiwaly geçiriler. Balkan welaýaty bolsa Medeniýet hepdeliginiň geçiriljek ýerine öwrüler.

Mundan başga-da, döwrebap Arkadag şäheriniň açylmagynyň 3 ýyllyk baýramçylygy mynasybetli dabaraly çäreler guralar. Döwlet Baştutanymyz Serdar Berdimuhamedow hasabaty diňläp, ähli meýilleşdirilen çäreleriň ýokary guramaçylyk derejesini üpjün etmegiň wajypdygyny belledi. Hormatly Prezidentimiz öňde duran dabaralaryň many-mazmunyny baýlaşdyrmak we olary milli ýörelgelere laýyk getirmek boýunça wise-premýere anyk tabşyryklary berdi.