Paýtagtymyzda Türkmenistanyň daşary işler ministri Raşid Meredowyň ýurda iş sapary bilen gelen Ukrainanyň DIM-niň wekilleri — daşary işler ministriniň orunbasary Oleksandr Mişenko we Ukrainanyň Daşary işler ministrliginiň Merkezi Aziýa ýurtlary bilen gatnaşyklar boýunça ýörite wekili Wiktor Maýko bilen resmi duşuşygy boldy. Gepleşikler dostlukly we özara düşünişmek ýagdaýynda guraldy.

Türkmenistanyň daşary syýasat edarasynyň metbugat gullugynyň ýaýradan resmi maglumatyna görä, duşuşygyň dowamynda taraplar ikitaraplaýyn hyzmatdaşlygyň häzirki ýagdaýyny we ony geljekde has-da kämilleşdirmegiň mümkinçiliklerini giňişleýin ara alyp maslahatlaşdylar. Syýasy-diplomatik, söwda-ykdysady we medeni ugurlardaky hyzmatdaşlygy täze derejä götermek baradaky meseleler maslahatlaşyldy.

Gepleşikleriň barşynda dürli pudaklardaky özara bähbitli gatnaşyklary yzygiderli giňeltmegiň, şeýle hem Birleşen Milletler Guramasy ýaly abraýly halkara düzümleriň hem-de guramalaryň çäklerindäki bilelikdäki diplomatik işleri utgaşykly dowam etdirmegiň zerurdygy aýratyn bellenilip geçildi.

Geçirilen ýokary derejeli gepleşikleriň netijeleri boýunça, taraplar iki döwletiň arasyndaky taryhy dostlukly gatnaşyklary mundan beýläk-de ösdürmäge we hyzmatdaşlygy täze ugurlar boýunça diwerisifikasiýa etmäge uly gyzyklanma bildirýändiklerini tassykladylar.