Türkmenistanyň Prezidenti Serdar Berdimuhamedow iş saparynyň çäklerinde Amerikanyň Birleşen Ştatlarynda ABŞ Kongresiniň Daşary işler boýunça Komitetiniň Günorta we Merkezi Aziýa boýunça Ýokarky toparynyň başlygy Bill Huizenga hem-de onuň orunbasary Sidni Kamlager-Daw bilen duşuşdy diýip, TDH habar berýär.

Amerikaly kanunçykaryjylar Türkmenistanyň Prezidentiniň saparynyň iki ýurduň arasyndaky dostlukly gatnaşyklary has-da berkitmäge hyzmat edýändigini bellediler.

Serdar Berdimuhamedow şu ýylda “C5+1” hyzmatdaşlyk görnüşiniň döredilmeginiň on ýyllygynyň bellenilýändigini ýatladyp, bu platformanyň howpsuzlyk, ykdysadyýet, energetika we klimat meselelerini ara alyp maslahatlaşmakda netijeli gural bolup çykyş edendigini aýtdy. Ol Türkmenistanyň bu ugurlarda hyzmatdaşlygy giňeltmäge taýýardygyny nygtady.

Döwlet Baştutanynyň bellemegine görä, ABŞ Kongresi bilen hyzmatdaşlyk ikitaraplaýyn gatnaşyklaryň möhüm bölegi bolup, kanunçylyk işinde tejribe alyşmaga hem-de sebitleýin we halkara gün tertibi boýunça pikir alyşmaga gönükdirilendir.

Serdar Berdimuhamedow kanun çykaryjy edaralaryň arasyndaky gatnaşyklaryň işjeňleşdirilmeginiň özara düşünişmäge we syýasy gatnaşyklaryň pugtalanylmagyna itergi berjekdigine ynam bildirdi.

Şeýle hem, iş saparynyň çäklerinde Türkmen-amerikan işewürler forumy guraldy, bu çäre söwda-ykdysady hyzmatdaşlygy ösdürmäge gönükdirilendir.

Taraplar birek-birege hoşniýetli arzuwlaryny beýan edip, iki ýurduň halklarynyň bähbidine hyzmatdaşlygy dowam etdirmäge taýýardyklaryny tassykladylar.