Türkmenistanyň Söwda-senagat edarasy ýurdumyzyň hususy pudagynyň wekillerini we telekeçilerini şu ýylyň güýzünde Rumyniýanyň paýtagtynda guraljak «Bucharest Auto Show & Accessories 2026» atly 23-nji halkara awtomobil we aksessuarlar sergisine gatnaşmaga çagyrýar. 6 — 11-nji oktýabr aralygynda meýilleşdirilen bu şanly çäre sebitiň iň uly sergi merkezleriniň biri bolan Romexpo toplumynda geçiriler. Bu taslama dünýäniň dürli künjeklerinden awto-pudagyň öňdebaryjy hünärmenlerini we maýadarlaryny bir meýdançada jemlemegi maksat edinýär.

Halkara sergi diňe bir döwrebap ýeňil we ýük ulaglaryny däl, eýsem awtomobil senagaty üçin zerur bolan ätiýaçlyk şaýlaryny, ýöriteleşdirilen enjamlary, elektronika ulgamlaryny we tehniki hyzmat ediş çözgütlerini hem aýratyn görkezmäge niýetlenendir. Çäräniň dowamynda dünýä belli brendler özleriniň iň soňky innowasion işläp taýýarlamalaryny, ekologik taýdan arassa ulaglaryny we sanly dolandyryş ulgamlaryny sarp edijilere görkezerler. Bu bolsa Ýewropanyň ulag bazaryndaky iň täze tendensiýalary öwrenmekde uly ähmiýete eýedir.

Guramaçylaryň maglumatlaryna görä, taslama diňe bir halkara korporasiýalar üçin däl, eýsem ulag we logistika ulgamynda täze ädimleri ätmek isleýän startaplar we orta telekeçilik üçin hem amatly şertleri üpjün edýär. Çäräniň çäginde guraljak işewürlik duşuşyklary we maslahatlar gatnaşyjylara täze distribýutorlyk şertnamalaryny baglaşmaga mümkinçilik berer. Şeýle şertler bazaryň häzirki wagtda öňe sürýän täze talaplaryna tiz uýgunlaşmaga ýordam edýär.

Türkmen wekilleriniň bu abraýly Ýewropa forumyna gatnaşmagy ýurdumyzda ulag-logistika we awtoservis hyzmatlarynyň hilini halkara standartlara laýyklykda döwrebaplaşdyrmaga ýardam eder. Ýaş telekeçiler we kompaniýalar dünýä hünärmenleri bilen tejribe alyşmaga, göni gatnaşyklary ýola goýmaga hem-de geljekde import-eksport amallarynyň täze ugurlaryny açmaga ajaýyp mümkinçilik alarlar.