Türkmenistanyň Oguz han adyndaky Inžener-tehnologiýalar uniwersitetiniň wekilleri 22–25-nji iýun aralygynda Beýik Britaniýanyň Liwerpul uniwersitetinde geçirilen CDIO 2026-nyň 22-nji Halkara maslahatyna işjeň gatnaşdylar. «Türkmenistan: Altyn asyr» neşiriniň habar bermegine görä, ýurduň wekiliýetiniň düzüminde uniwersitetiň Kiberfiziki ulgamlar kafedrasynyň uly mugallymy Yslam Orazow hem-de Ylmy-tehnologiýa merkeziniň müdiri Ahal Akgaýew dagylar bar boldy. CDIO (Conceive – Design – Implement – Operate, ýagny «Oýlap tapmak – Taslamak – Durmuşa geçirmek – Dolandyrmak») başlangyjy inženerçilik bilimini innowasion ulgamda kämilleşdirmäge gönükdirilen dünýä derejeli platformadyr. Bu ýylky foruma jemi 27 döwletden 71 uniwersitetiň 157 sany öňdebaryjy wekilleri ýygnandy.

«Talyplaryň hünär taýdan ösüşini kämilleşdirmek: bahalandyrmada we ikitaraplaýyn arabaglanyşykda innowasiýalar» diýen esasy mowzugyň çäginde, gatnaşyjylar inženerçilik bilimi ulgamynda bilimleri bahalandyrmagyň döwrebap innowasion usullaryny we hünär başarnyklaryny ösdürmegiň ýollaryny ara alyp maslahatlaşdylar. Halkara çärede çykyş eden türkmen alymlary öz uniwersitetlerinde kiberfiziki ulgamlar, häzirki zaman innowasion tehnologiýalary ugurlary boýunça alnyp barylýan ylmy-barlag işleri we inženerçilik bilimini halkara standartlara laýyk getirmek boýunça gazanylan tejribeler barada giňişleýin maglumat berdiler. Şeýle hem olar CDIO akademiki ulgamyna girýän beýleki daşary ýurt ýokary okuw mekdepleriniň wekilleri bilen guralan toparlaýyn işjeň mejlislere hem gatnaşyp, tejribe alyşdylar.