Abu-Dabi şäherinde Eswatini Patyşalygynyň Patyşasy Mswati III bilen «Aýdyň Gijeler» hojalyk jemgyýetiniň baş direktory Hydyrberdi Abdurahmanowyň ýolbaşçylygyndaky wekiliýetiň arasynda ýokary derejeli gepleşikler geçirildi. Duşuşygyň netijesinde täze nesil goragly resminamalary we ýokary tehnologiýaly önümleri öndürmek we ibermek baradaky bilelikdäki taslamany durmuşa geçirmek boýunça möhüm ylalaşyklar gazanyldy. Şeýle hem taslamanyň çäklerinde türkmen tarapyna afrika döwletiniň çäginde önümçilik meýdançalaryny bermek göz öňünde tutulýar.

Mälim edilşi ýaly, Mertebeli Patyşa Mswati III Eswatini Patyşalygynyň raýatlary üçin 1 500 000 sany milli şahsyýetnama kartyny we 500 000-den gowrak biometrik pasporty taýýarlamak boýunça taslama hemmetaraplaýyn döwlet goldawyny bermäge taýýardygyny aýtdy. Bu bilelikdäki başlangyç ýurduň ilatyny sanlylaşdyrmak we şahsyýeti anyklaýyş ulgamyny kämilleşdirmek ugrunda ädilen strategik ädim boldy. Ýokary derejeli bu duşuşyga eswatini tarapyndan döwlet ýolbaşçylygynyň beýleki esasy wekilleri hem gatnaşdy.

Öndüriljek täze sanly resminamalar Ýewropanyň «Austrian Cards» kompaniýasynyň ýokary goragly çip platformasyna esaslanar. Şeýle hem önümçilikde ICAO-nyň we Ýewropa Bileleşiginiň talaplaryna doly laýyk gelýän häzirki zaman kriptografik hem-de biometrik tehnologiýalar ulanylar. Bu bolsa resminamalaryň dünýä standartlarynyň iň ýokary derejesine laýyk gelmegini we galp ýasalmagyndan doly goralmagyny üpjün eder.

Gazanylan ylalaşyklar Türkmenistan bilen Eswatini Patyşalygynyň arasynda diňe bir sanly resminama dolanyşygy pudagynda däl, eýsem telekommunikasiýa, maglumat tehnologiýalary, yşyklandyryş tehnikasy we ýol infrastrukturasy ýaly ugurlarda hem uzak möhletli hyzmatdaşlygyň binýadyny goýdy. Iş saparynyň dowamynda «Aýdyň Gijeler» hojalyk jemgyýetiniň wekilleri Eswatininiň Daşary işler, Içeri işler hem-de Söwda we senagat ministrlikleri bilen aýratyn ikitaraplaýyn duşuşyklary geçirip, hyzmatdaşlygyň beýleki ugurlaryny ara alyp maslahatlaşdylar.