Perunyň Aukalýama şäherinde binagärlik taryhynda seýrek duş gelýän täsin öý bina edildi. Bu öýüň ini bary-ýogy 63 santimetre deň bolup, ol häzirki wagtda dünýäniň iň dar ýaşaýyş jaýy hasaplanýar. «Oddity Central» neşiriniň maglumatlaryna esaslanýan «Gazeta.ru» saýtynyň habar bermegine görä, bu gurluşyk eýýäm ýerli ýaşaýjylaryň we daşary ýurtly jahankeşdeleriň ünsüni özüne çekmegi başardy.

Taslamanyň awtory Fabio Moreno oňaýly ýaşaýyş üçin hökman uly meýdanyň gerek däldigini subut etmäge çalyşýar. Onuň pikiriçe, bagtly ýaşamak öýüň göwrümine däl-de, eýsem bar bolan çäkli meýdanyň näderejede ýerlikli we akylly ulanylmagyna baglydyr. Binagär bu darajyk çäkde adaty durmuş üçin zerur bolan ähli şertleri döretmegi başarypdyr.

Öýüň içiniň örän darlygyna garamazdan, onuň içinde aşhana, suwa düşülýän otag, ýatalga, iş orny we hatda kir ýuwulýan ýer hem ýerleşdirildi. Binanyň gurluşy şeýle bir inçe meýilleşdirilipdir welin, her bir santimetr anyk maksat üçin hyzmat edýär. Emma jaýyň aýratynlygy sebäpli, onuň içine bir wagtda diňe bir adam girip bilýär.

Häzirki wagtda Fabio Moreno özüniň bu täsin öýüni Ginnesiň rekordlar kitabyna girizmek üçin resmi taýdan ýüz tutdy. Onuň maksady bu binanyň dünýäde iň dar ýaşaýyş jaýy hökmünde resmi dereje almagyny gazanmakdyr. Häzirki wagtda degişli hünärmenler tarapyndan bu arza öwrenilýär we tiz wagtda täze dünýä rekordynyň hasaba alynmagyna garaşylýar.