Ylmy barlaglar adamyň ahlak garaýyşlary bilen edýän işleriniň arasyndaky tapawudyň neýrobiologik sebäplerini ýüze çykardy. Alymlaryň anyklamagyna görä, ikiýüzlülik diňe bir häsiýet aýratynlygy bolman, eýsem beýniniň wentromedial prefrental gabygynyň işjeňligine gönüden-göni baglydyr. Bu açyş ynsanyň özüne peýda geljek ýagdaýynda näme üçin ahlak kadalaryndan dänip, başgalara baha berende bolsa şol kadalary berk talap edýändigini ylmy taýdan düşündirýär.

Sýaoçu Çžanyň ýolbaşçylygyndaky hünärmenler topary adamyň şahsy bähbitleri bilen ahlak borçlarynyň arasyndaky gapma-garşylygyň beýni tarapyndan nähili dolandyrylýandygyny öwrendiler. Barlaglar görkezişi ýaly, beýni öz kararlarymyzy köplenç peýda nukdaýnazaryndan, başgalaryň hereketlerini bolsa ahlak nukdaýnazaryndan seljerýär. Bu bolsa adamyň öz bähbidi üçin ýalana ýüz urmagyna, ýöne başgalaryň ýalanyny berk ýazgarmagyna sebäp bolýan özboluşly bir «biologik mehanizmdir».

Bu ýagdaýy anyklamak üçin 58 meýletinçiniň gatnaşmagynda fMRT skanirlemesini ulanmak arkaly ýörite synaglar geçirildi. Kart oýunlarynyň dowamynda gatnaşyjylaryň maddy baýrak almak üçin ýalan sözleýän pursatlaryndaky we beýleki adamlaryň hereketlerine baha berýän pursatlaryndaky beýni işjeňligi deňeşdirildi. Şeýle-de, alymlar beýniniň degişli bölegine pes güýçli elektrik signallary arkaly täsir edip, bu işjeňligiň ikiýüzli diýlip atlandyrylýan hereketleriň döremegine nähili täsir edýändigini subut etdiler.

Barlagyň awtorlarynyň biri bolan Hunweniň pikiriçe, bu ylmy netijeler ahlak taýdan durnuklylygyň we sözüňde tapylmagyň diňe bir dogabitdi häsiýet bolman, eýsem türgenleşdirip boljak bir ukyphydygyny görkezýär. Beýniniň bu işjeňlik mehanizmlerine düşünmek geljekde bilim ulgamynda täze usulyýetleri döretmäge, şeýle hem has kämil we ahlakly emeli aň ulgamlaryny işläp taýýarlamaga ýardam eder. Bu açyş ynsan tebigatyna täzeçe garalmagyna şert döredýär.