Türkmenistanyň paýtagtynda sport äleminde ähmiýetli waka bolup geçdi: Aşgabat şäheriniň ýöriteleşdirilen küşt-şaşka mekdebi küşt boýunça ilkinji gezek guralan toparlaýyn çempionatyň jemleýji oýunlaryna mezunlyk etdi. Türkmenistanyň Küşt federasiýasynyň başlangyjy bilen geçirilen bu taryhy ýaryşda dürli sport we bilim edaralaryna wekilçilik edýän 12 topar özara güýç synanyşdy. Jemi 100-den gowrak zehinli küştçini bir ýere jemlän bäsleşik, ýurtda bu sportuň täze ösüş derejesine çykandygyny görkezdi.

Bäsleşigiň tertibi 11 tapgyrdan ybarat bolup, her bir duşuşyk bir wagtyň özünde 6 tagtada alnyp baryldy. Ýaryşyň iň täsirli pursatlarynyň biri hökmünde 12–14 ýaşly ýetginjeklerden düzülen «NESIL» toparynyň görkezen oýny bellenildi. Ýaş küştçüler tejribeli ussatlara garşy tutanýerli göreş alyp baryp, tomaşaçylaryň we hünärmenleriň ünsüni özüne çekmegi başardylar. Bu bolsa ýurdumyzda küşt boýunça ýaş nesliň uly geljeginiň bardygyny ýene bir gezek subut etdi.

Çempionatyň ykbalyny kesgitlän iň dartgynly pursat meşhur doganlar Maksat we Saparmyrat Atabaýewleriň arasyndaky duşuşyk boldy. «AŞGABAT» we «GALKAN» toparlarynyň öňdebaryjy oýunçylarynyň arasyndaky bu intellektual söweş bäş sagatlap dowam etdi. Iki ussadyň ýokary derejeli oýny deňme-deň hasap bilen tamamlandy we bu netije «AŞGABAT» toparyna umumy utuklar boýunça birinji orny eýelemäge şert döretdi.

Ýaryşyň dabaraly jemlenişinde ýöriteleşdirilen küşt-şaşka mekdebiniň «AŞGABAT» topary çempionlyk ugrunda göçme kubogyň ilkinji eýesi boldy. Hormatly ikinji orna Türkmenistanyň Içeri işler ministrliginiň «GALKAN» sport kluby, üçünji orna bolsa Türkmenistanyň Döwlet bedenterbiýe we sport institutynyň «TALYP SPORT» topary mynasyp görüldi. Ýeňijilere we aýratyn tapawutlanan küştçülere medallar, şahadatnamalar hem-de gymmatly sowgatlar gowşuryldy.

 

 

Kemal WELMÄMMEDOW,

 Türkmenistanyň Daşary işler ministrliginiň

 Halkara gatnaşyklary institutynyň

 Halkara žurnalistikasy fakultetiniň III ýyl talyby.