Oýun sanawy
Türkmen-rus mekdebiniň okuwçylary B. Amanow adyndaky çagalar kitaphanasyna gezelenç etdiler
01 Aprel. 06:55Ýakynda A.S. Puşkin adyndaky bilelikdäki Türkmen-rus orta umumybilim berýän mekdebiniň okuwçylary üçin B. Amanow adyndaky Döwlet çagalar kitaphanasyna gyzykly gezelenç guraldy. Bu çäre ýaş nesliň kitap okmaga bolan höwesini artdyrmak we olary kitaphananyň baý dünýäsi bilen tanyşdyrmak maksady bilen amala aşyryldy.
Kitaphananyň hünärmenleri ýaş myhmanlary uly mähir bilen garşylap, olara bu bilim ojagynyň gurluşy, hyzmatlary we kitap gorlary barada giňişleýin maglumat berdiler. Okuwçylar kitaplaryň nähili tertipde saklanýandygy we okyjylara nähili hyzmat edilýändigi bilen ýakyndan tanyş boldular.
Gezelenjiň dowamynda aýratyn täsirli pursatlar şulardan ybarat boldy:
• Ýaş okyjylar üçin ýörite bölüm: Kiçi ýaşly okuwçylar «Mekdebe çenli çagalar we 1–3 synp okuwçylary üçin kitaplar» bölüminde bolup, öz ýaşlaryna laýyk gelýän reňkli we gyzykly neşirleri synladylar.
• Döredijilik sergisi: Çagalar kitaphananyň beýleki ýaş agzalary tarapyndan çekilen erteki gahrymanlarynyň suratlaryna we el işleri bolan gurjaklara uly gyzyklanma bildirdiler.
• Sorag-jogap alyşygy: Mekdebiň mugallymlary we okuwçylary kitaphananyň işgärleri bilen söhbetdeş bolup, kitap saýlamak we kitaphananyň iş tertibi baradaky özlerini gyzyklandyrýan soraglara jogap aldylar.
Bu gezelenç okuwçylarda ýakymly täsirler galdyrdy we olaryň geljekde kitaphananyň durnukly okyjylaryna öwrülmegine itergi berdi.
Şeýle hem okanyň
Mary welaýatynda ýylda 50 müň tonna önüm öndürmäge ukyply täze süýt gaýtadan işleýän kärhana dabaraly açyldy
26 Okt. 10:04Mary welaýatynyň Mary etrabynyň «Täze Oba» daýhan birleşiginiň çäginde ýylda 50 müň tonna süýdi gaýtadan işlemäge niýetlenen döwrebap önümçilik toplumy dabaraly ýagdaýda ulanyşa berildi. Täze senagat desgasynyň açylyş dabarasyna ýerli häkimiýet edaralarynyň, jemgyýetçilik guramalarynyň, syýasy partiýalaryň wekilleri, senagat kärhanalarynyň hünärmenleri, talyplar ham-da hormatly ýaşulular gatnaşdylar. Bu döwrebap toplum sebitiň azyk senagaty kuwwatyny ep-esli artdyrmaga uly goşant goşar.
Täze zawodyň gurluşyk işleri hususy telekeçi Guwançmyrat Orazowa hemişelik ulanmak üçin bölünüp berlen 3,5 gektar meýdanda alnyp baryldy. Taslamanyň baş potratçysy hökmünde ýurduň öňdebaryjy «Täze Aý Önümleri» hojalyk jemgyýeti çykyş etdi, alnyp barylan gurluşyk işleri bolsa Türkiýe Respublikasynyň ýöriteleşdirilen kompaniýasy tarapyndan enjamlaşdyrylan metal gurluşlar we kämil materiallar bilen üpjün edildi.
Kärhana iň döwrebap tehnologik liniýalar, önümçilik sehler hem-da barlaghana-gözegçilik bölümleri bilen doly üpjün edilendir. Bu ýokary tehnologik enjamlar köp görnüşli süýt we gatyk önümlerini öndürmäge, amallaryň netijeliligini ýokarlandyrmaga we önümleriň peýdaly häsiýetlerini saklamak bilen olaryň saklanyş möhletini uzaltmaga mümkinçilik berýär. Desganyň ulanyşa girizilmegi içerki bazary ýerli önümler bilen bökdençsiz üpjün etmäge hem-da sebitde täze iş orunlaryny döretmäge şert döredýär.
Blitz