Meksikanyň paýtagty Mehiho şäherinde ýerleşýän meşhur «Asteka» stadionynda futbol boýunça 2026-njy ýylyň dünýä çempionatynyň açylyş duşuşygynyň öňüsyrasynda dünýä döwletleriniň baýdaklary dabaraly ýagdaýda galdyryldy. Şolaryň hatarynda taryhy pursatlara şaýat bolan Türkmenistanyň Döwlet baýdagy hem bar. Biziň ýaşyl baýdagymyz iňlis elipbiýsiniň halkara tertibine laýyklykda, Türkiýäniň we Tuwalunyň baýdaklarynyň edil ortasynda ýerleşdirildi.

Garaşylýan uly ýaryşyň açylyş duşuşygynda çempionaty guraýjy Meksikanyň milli ýygyndysy Günorta Afrika Respublikasynyň güýçli ýygyndysy bilen duşuşar. Duşuşygyň Aşgabat wagty bilen sagat 23:55-de başlanmagyna garaşylýar. Dünyäniň iň uly sport baýramçylygynyň bu ilkinji oýnunyň göni ýaýlymy ýurdumyzda «Belet» sanly platformasy arkaly futbol muşdaklaryna durnukly gowşurylar.

Futbol boýunça 2026-njy ýylyň dünýä çempionaty 11-nji iýun — 19-njy iýul aralygynda Demirgazyk Amerikanyň üç sany ägirt döwletiniň — ABŞ-nyň, Kanadanyň we Meksikanyň iň döwrebap stadionlarynda geçiriler. Ýaryşyň toparçalaýyn tapgyry 11–27-nji iýun aralygynda dowam edip, her bir milli ýygyndy aýlaw ulgamy boýunça jemi üç sany jogapkärli duşuşyk gurar.

Täze düzgünlere laýyklykda, indiki pleý-off tapgyryna her toparçada ilkinji iki orny eýelän iň gowy netijeli ýygyndylar, şeýle hem üçünji orunlary eýelän toparlaryň arasynda iň ýokary netije we utuk gazanan sekiz sany güýçli ýygyndy gatnaşmaga hukuk alar. Bu gezekki dünýä çempionatynyň çäklerinde jemi 104 sany duşuşyk geçiriler we bu görkeziji dünýä futbolynyň taryhynda täze rekord hökmünde hasaba alynar.