Günorta Koreýanyň çip öndürýän ägirdi «SK Hynix» paýnamalarynyň uly möçberde ýokarlanmagy netijesinde ýurduň iň gymmat kompaniýasyna öwrüldi. Halkara maliýe maglumatlaryna görä, bu üýtgeşme sebäpli «Samsung Electronics» soňky 25 ýylyň dowamynda ilkinji gezek ýurtda bazar kapitalizasiýasy, ýagny umumy bahasy boýunça eýeläp gelen liderlik ornuny ýitirdi. Häzirki wagtda «SK Hynix-iň» bazar bahasy 208 trillion wona (takmynan 135 milliard dollar) ýeten bolsa, «Samsung-yň» görkezijisi 206,67 trillion wona çenli aşak düşdi.

Mundan ýigrimi ýyl ozal bergileri zerarly bankrotlygyň bosagasynda duran «SK Hynix» kompaniýasynyň beýleki bäsdeşlerinden öňe saýlanmagyna häzirki zaman emeli aň tehnologiýalarynyň çalt ösmegi ýardam etdi. Kompaniýa «Nvidia» we «Google» ýaly tehnologiýa ägirtlerini ýokary tizlikli ýat mikroshemalary (HBM) bilen üpjün etmek boýunça esasy şertnamalary baglaşdy. Bilermenleriň çykaran netijelerine görä, häzirki wagtda bu kompaniýa emeli aň ulgamlary üçin zerur bolan dünýäniň innowasion HBM ýat bazarynyň 61 göterimini diýen ýaly öz elinde saklaýar.