Wenesuelada 24-nji iýunda gysga wagt aralygynda 7,2 we 7,5 bal güýjünde iki sany weýrançylykly ýer titremesi boldy. «Reuters» agentliginiň berýän maglumatlaryna görä, sarsgynlaryň ojaklary Karib deňziniň kenarýakasynda, Moron şäheriniň golaýynda, 10–13 kilometr çuňlukda ýerleşipdir. Betbagtçylyk paýtagt Karakasda we ýurduň beýleki sebitlerinde ägirt uly weýrançylyklara eltdi. Wenesuelanyň Içeri işler ministrligi paýtagtda köp sanly ýaşaýyş jaýlarynyň we desgalaryň ýykylandygyny tassyklady. Ýurtda resmi taýdan adatdan daşary ýagdaý yglan edildi. ABŞ-nyň Geologiýa gözegçiligi gullugynyň (USGS) deslapky çaklamalaryna görä, pidalaryň sany uly bolup biler, emma ýerli häkimiýetler ölenleriň we ýaralananlaryň takyk sanyny anyklamagy dowam etdirýärler.

Prezidentiň wezipesini wagtlaýyn ýerine ýetirýän Delsi Rodriges esasy sarsgynlardan soň ýene 20-den gowrak kiçi sarsgynlaryň (afterşoklaryň) bolandygyny, taryhy La-Guaýra portunda we Karakas howa menzilinde weýrançylyklaryň emele gelendigi sebäpli howa menziliniň wagtlaýyn ýapylandygyny mälim etdi. Halkara hünärmenler sebitde ilki sunami howpuny yglan eden hem bolsalar, bir sagatdan soň bu duýduryşy ýatyrdylar. Gözganyň sebäbi hökmünde Wenesuelanyň Karib deňzi we Günorta Amerika tektonik plitalarynyň durnuksyz çatrygynda ýerleşýändigi görkezilýär.

Şu waka bilen birwagtda, 25-nji iýuna geçilen gije Ýaponiýanyň Honsýu adasynyň demirgazyk-gündogar kenarýakasynda hem 7,2 bal (USGS-e görä 6,9 bal) güýjünde başga bir güýçli ýer titremesi boldy. Sarsgynyň merkezi Hatinohe şäherinden (Aomori prefekturasy) 67 kilometr uzaklykda, Ýuwaş ummanynyň çuňlugynda ýerleşýär. Häzirki wagta çenli Ýaponiýadaky ýer titremesi boýunça ýitgiler we adam pidalary barada resmi maglumat gelip gowşmady.