ABŞ-nyň Men ştatynyň uniwersitetiniň alymlary tarapyndan geçirilen täze ylmy-barlaglar ýabany çernikanyň adamyň saglygy üçin bahasyna ýetip bolmaz peýdasynyň bardygyny ýüze çykardy. 20 ýylyň dowamynda alnyp barlan synaglaryň we gözlegleriň netijeleri bu kiçijik miwäniň ýürek-damar ulgamyny we aşgazan-iýmit siňdiriş ýollaryny sagdyn saklamakda örän täsirlidigini görkezýär. Bu baradaky ylmy makala abraýly «Critical Reviews in Food Science and Nutrition» žurnalynda çap edildi.

Alymlaryň bellemegine görä, ýabany çernika adam tarapyndan ýetişdirilýän medeni görnüşlerinden özüniň baý düzümi bilen düýpli tapawutlanýar. Ýabany miwäniň düzüminde antioksidantlar iki esse köp bolup, olar öýjükleriň garramagynyň öňüni alýar. Şeýle hem onda kletçatka 72 göterim köp mukdardadyr, bu bolsa iýmit siňdiriş ulgamynyň kadaly işlemegine we madda çalşygynyň gowulanmagyna gönümel ýardam edýär.

Bu miwäniň ýürek üçin peýdasy onuň düzümindäki antosianlar — ösümlik birleşmeleri bilen düşündirilýär. Ýabany çernikada bu maddalar medeni görnüşine görä üçden bir derejede köpdür. Antosianlar gan damarlarynyň diwarlaryny berkidýär, bedendäki dürli çişme pursatlaryny peseldýär we gan aýlanyşyny kadalaşdyrýar. Netijede, bu miwäni yzygiderli iýmek ýürek keselleriniň döreme töwekgelçiligini ep-esli azaldyp biler.

Hünärmenler bu oňyn täsirleri duýmak üçin günde takmynan ýarym ýa-da bir käse ýabany çernika iýmegi maslahat berýärler. Bellärlikli tarapy, miwäniň diňe bir ter görnüşi däl, eýsem doňdurylan ýa-da guradylan görnüşleri hem örän peýdalydyr. Alymlar gaýtadan işlenen pursatynda-da ýabany çernikanyň düzümindäki biologik işjeň maddalaryň we witaminleriň öz güýjüni doly saklaýandygyny tassyklaýarlar.